MDR TELEWIZIJA | WUHLADKO | 02.11.2024 | 11:45 hodź. WUHLADKO – nowemberske wusyłanje: Serb w New Yorku
Hauptinhalt
New York je pisane město, tam słyšiš mnohe rěče a dožiwiš wšelake kultury a narodnosće. Tež serbsku rěč móžeš w ameriskej metropoli słyšeć – to je team WUHLADKA njedawno nazhonił. WUHLADKO předstaji Serba w New Yorku, sobotu, 04.11.2024, 11.45 hodź. w MDR telewiziji.
Serbski profesor w New Yorku
Wón čita a rozłožuje stare teksty wuznamnych filozofow kaž Platona a Aristotelesa – a je na tutym polu drje jedyn z najwuznamnišich ekspertow po cyłym swěće. Marko Malink dźěła jako profesor filozofije a klasiskeje filologije na uniwersiće w New Yorku. Ze swojej młodej swójbu bydli wosrjedź města na wuchodźe USA – zwisk k domiznje pak njeje ženje zhubił. Ze swojej jednolětnej dźowku rěči serbsce a wobstajnje sćěhuje powěsće ze swojeje łužiskeje domiznje. WUHLADKO předstaji serbskeho ekspertu na polu starogrjekšćinje a je rodźeneho Budyšana w New Yorku wopytało.
Zabyte wuměłstwo
Galerija Nowych mištrow w Drježdźanach słuša k najwuznamnišim zběrkam mólbow swěta – z drohoćinkami wot Caspara Davida Friedricha hač ke Gerhardej Richterej. Ale namakaš tu tež wosebiteho wuměłca, kotrehož twórby njenańdźeš jenož tu w Drježdźanach, ale w najskerje hišće wjele wjetšej ličbje we Łazku blisko Róžanta. Su to wobrazy Fritza Trögera, kiž bě nimo Otta Dixa jedyn z najwažnišich zastupjerjow wuměłskeho stila Noweje wěcownosće. Tola přiwšěm je Tröger, rodźeny před dokładnje 130 lětami, hač do dźensnišeho mało znaty.
Na časnikach wjerćał
Dwójce wob lěto ma Jürgen Njek z Chrósćic w swojim małym wobchodźe wosrjedź wsy
ruce połne dźěla. Wjac hač 350 časnikow – wulkich a mjeńšich – dyrbi přestajić, pak hodźinu wróćo abo doprědka. Tola z tutym sprócnym dźěłom njeje za Jürgen Njeka słužba dawno zakónčena. Na kóncu čaka hišće hoberski časnik cyrkwineje wěže. Za wobćežny puć na wěžu trjeba kondiciju a dobrej noze. Kamera WUHLADKA je jeho při tym přewodźała.
WUHLADKO: sobotu, 02.11.2024, 11.45 hodź. w telewiziji MDR (Sakska regionalna), runočasnje jako livestream w interneće a w mediatece ARD. Wšitke přinoški maja němske podtitule. Wospjetowani: póndźelu, 04.11.2024, 6.45 hodź. w MDR a sobotu, 09.11., 13.30 hodź. w RBB (Braniborska).
