MDR TELEWIZIJA | WUHLADKO | 05.04.2025 | 12:00 hodź. WUHLADKO – aprylske wusyłanje: Serbski sydlenski rum rosće
Hauptinhalt
Serbski sydlenski rum w Hornjej Łužicy budźe drje hižo bórze tróšku wjetši. Přičina je wobzamknjenje gmejnskeje rady Wóslinka, gmejny na sewjeru Budyskeho wokrjesa. Tam chce so sydom z cyłkownje dźewjeć wsow gmejny Serbskemu sydlenskemu rumej přizamknyć. WUHLADKO praša so za přičinami tutoho rozsuda – sobotu, 05.04.2025, 12.00 hodź. w MDR telewiziji.
Tole su dalše temy wudaća w aprylu:
Ćěmne prognozy
Najmłódša gmejna Sakskeje je w serbskej Hornjej Łužicy. Hižo wjele lět steji gmejna Ralbicy-Róžant na prěnim městnje w tutej statistice a je z přerěznej starobu 41,4 lět najmłódša wšěch 415 gmejnow w Sakskej. Tute ličby pochadźeja z lěta 2021. Mjeztym registruja pak tež w Delanach mjenje porodow – z wotpowědnymi wuskutkami na pěstowarnje, šule a porodne stacije w chorownjach. WUHLADKO je so naprašowało.
Wot pomocneho wučerja k swětoznatemu chemikarjej
Mamy Myto Ćišinskeho abo myto Zejlerja, pomjenowane po wusahowacych serbskich wosobinach. Tola štó znaje myto Alwina Mitaša, pomjenowane po najskerje najwuznamnišim serbskim wědomostniku scyła? Tute spožči kóžde lěto firma BASF najlěpšim chemikarjam na polu katalyzoweho slědźenja. Pomjenowane je myto po jednym z najwuznamnišich chemikarjow swojeho časa a najskerje jeničkim Serbje, kiž by nimale Nobelowe myto dóstał: profesor Alwin Mitaš. WUHLADKO pyta za slědami tutoho w Hornjej Łužicy nimale pozabyteho serbskeho wědomostnika.
Na tradicije bohate rjemjesło
Kěrchow w Ralbicach pyta drje po cyłej Němskej swojeho runjeća a je w dwurěčnej Hornjej Łužicy turistiski magnet. Jednotne, běło-złote drjewjane křiže su markantne za tutón kěrchow, z wulkeho dźěla zhotowjene a hladane wot rězbarja Mikławša Dyrlicha z Noweje Wjeski. Wón wjedźe tradiciju swojeho nana dale a stwori w zašłych lětdźesatkach sta narownych křižow, nabožne symbole a figury za cyrkwje, kapałki abo priwatnych kupcow. Krótko do jutrow ma kóžde lěto ruce połnej dźěła – w martrownym tydźenju stajeja na Ralbičanskim kěrchowje křiže za zemrětych zašłeho lěta. WUHLADKO je drjeworězbarja w jeho dźěłarni wopytało.
WUHLADKO: sobotu, 05.04.2025, 12.00 hodź. w telewiziji MDR (Sakska regionalna), runočasnje jako livestream w interneće a w mediatece ARD. Wšitke přinoški maja němske podtitule. Wospjetowani: póndźelu, 07.04.2025, 6.50 hodź. w MDR a sobotu, 12.4. w 13.35 hodź. w RBB (Braniborska).
