MDR TELEWIZIJA | WUHLADKO | 07.09.2024 | 11:45 hodź. WUHLADKO – septemberske wusyłanje: po wólbach

Tule temy wudaća w septembru:

Po wólbach

Wólby noweho sakskeho krajneho sejma su tež w dwurěčnej Hornjej Łužicy politisku krajinu změnili. Serbskorěčny zapósłanc CDU Marko Šiman je po 34 lětach swój direktny mandat zhubił, zaćehnje pak přez krajnu lisćinu přiwšěm do krajneho sejma. Prěni raz sedźi z tym jenož hišće jenički Serb w sakskim krajnym parlamenće. Kotre konsekwency hroža a kak budu nowe politiske konstelacije serbsku politiku w swobodnym staće wobwliwować? WUHLADKO so naprašuje.

Nawrót łučinoweje krajiny

Njeje to drje najwjetša, ale jedna z najwobšěrnišich rewitalizacijow łučinoweje krajiny w Sakskej – renaturěrowanje Čornicy mjez Prěčecami a Haslowom pola Budyšina.
Jako narunanje za wutwar awtodróhi A4 so tu wulki wotrězk Čornicy zaso do swojeho stareho rěčnišća wróći. W 1970tych lětach bu jónkrótna meandrowaca łučinowa krajina mjez Haslowom a Prěčecami zničena, rěka zrunana, łuki wusušene. Tutón tehdyši ekologiski zmylk so nětko zaso koriguje.

Radšo z ruku hač z nohomaj

Hač na sportnišću abo na kromje hrajnišća: kopańca je drje we Serbach najwoblubowaniša sportowa zaběra. Tola serbscy koparjo dóstanu woprawdźitu konkurencu. Nawal wopytowarjow a hrajerjow pola beachwolejbuloweje tury Radija Satkule pokaza – wolejbul je předewšěm pola młodych sportowčow a sportowcow tak woblubowany kaž drje nihdy do toho. Sportowe towarstwa liča dźeń a wjac čłonow, w kóždej hišće tak małej wsy nastawaja beachwolejbulowe hrajnišća. WUHLADKO poda so na slědy a praša so, čehodla je wolejbul w Serbach tuchwilu tak woblubowany.