Program za młodźinu Młodźinski program SERBSKEHO ROZHŁOSA

Moderatorojo a redaktorojo RADIJA SATKULE su młodźi serbscy dorostowi žurnalisća, někotři z nich hišće studenća, druzy zdźěla hižo swobodni sobudźěłaćerjo našeho sćelaka, kotřiž młodźinske wusyłanja přihotuja. Nazhonići kolegojo SERBSKEHO ROZHŁOSA jim při tym radźa a pomhaja. Zaměr toho je, spěchować mjez młodostnymi wšědne wužiwanje serbskeje rěče. Tajki tydźenski młodźinski program za narodnu mjeńšinu pyta tuchwilu po cyłej Europje swojeho runjeća.

Dnja 12. apryla lěta 1999 je SERBSKI ROZHŁÓS sćelaka MDR k prěnjemu razej wusyłał wosebity wječorny hodźinski program za serbsku młodźinu. Danko Handrik a Roman Nuk běštaj prěnjej moderatoraj młodźinskeho wusyłanja, kotrež so zdypkom we wosmich na žołmje 100,4 megahertzow započa. Z tutoho dnja ma RADIJO SATKULA krute městno w programje SERBSKEHO ROZHŁOSA, wot 7. meje 2001 je wone na dwě hodźinje rozšěrjene a runočasnje tež w Delnjej Łužicy, přez 93,4 megahertzow, słyšeć. Šulerjo, wučomnicy a studenća smy, kotřiž hłownje tutej hodźinje sami přihotujemy a wuhotujemy. Nazhonići redaktorojo Budyskeho studija nas při tym z radami a pokiwami podpěruja.

„Newsy ze wsy“, tak mjenujemy powěsće ze žiwjenja serbskich młodostnych, ale tež z druhich wobłukow, kotrež młodźinu zajimuja. A přiwisnicy sporta zhonja najaktualniše wuslědki serbskich sportowcow w „Sportowych newsach“.
W „Črjopjencu“ zhoniće, kajke zarjadowanja su předwidźane, ale tež za Waše a naše zjawne wozjewjenja a zdźělenja je tu městna a w „Hudźbnym kornarju“ prawidłownje mjezynarodne hudźbne skupiny abo interpretow předstajimy. A wězo rady z Wami diskutujemy, tež wo „horcych temach“.
Chceće wjac wo nami a wo wobsahach našich wusyłanjow wědźeć? Chceće zhonić, hdy so što, hdźe a čehodla we dwurěčnych kónčinach stała? Njeznajeće woprawdźe hišće našu póštowu a e-mail-adresu abo naše telefonowe čisło? To stłóčće tola cyle jednorje raz wony link!