Program Rańši program SERBSKEHO ROZHŁOSA
Hauptinhalt
"SERBSKI ROZHŁÓS - wita Was" – tak a podobnje je wšědny postrow rańšich moderatorow w Hornjej a Delnjej Łužicy z mnohich radijow słyšeć.
08. winowca 2010, 09:32 hodź.
Z regionalneho studija sćelaka MDR SAKSKA w Budyšinje wusyła so wšědnje třihodźinski rańši program w serbskej rěči. Serbske rozhłosowe wusyłanja njejsu jenož medij komunikacije w maćeršćinje, ale spěchuja a tworja tež kulturu Serbow.
Wot póndźele do pjatka, stajnje wot 5.00 do 9.00 hodź., kaž tež sobotu rano, wot 6.00 do 10.00 hodź., wuhotuja serbscy redaktorojo a reporterojo Budyskeho studija rańši program w serbskej rěči. Noticki, noty a nowinki z dwurěčneje Łužicy tworja hłowny wobsah magacinowych wusyłanjow, w kotrychž so rěčnicy bjezwuwzaćnje w swojej maćeršćinje wupraja. Jeničce němske powěsće z Drježdźan so ke kóždej połnej hodźinje přewozmu. Muzikalisce wobrubja so wusyłanja přewažnje ze serbskej hudźbu, wot dujerskeje a ludoweho spěwa, hač k modernej popowej a rockowej hudźbje. Wězo su słyšeć tež mjezynarodne zynki, čěske, pólske, italske, francoske, jendźelske a druhe.
