Rěčny kućik dr. Sonje Wölkoweje z wusyłanja 10.12.2014 „Cranberry“

Njedawno dóńdźe k nam do Serbskeho instituta naprašowanje, kak rěkaja serbsce jahodki z mjenom Cranberry, jara strowe a bohate na witamin C. Dóstachmy tež hnydom namjet – móhło so tola rjec krusnicy. Tajke mjeno bě snano inspirowane wot spočatka słowa Cranberry a wot serbskich brusnicow, kiž su z tutymi jahodami přiwuzne. Tola njeje ani trjeba, sej tajku hybridnu twórbu wumyslić. Jendźelske Cranberry je mjenujcy němsce Moosbeere, dokładnišo großfrüchtige Moosbeere, a za tutu mamy w serbšćinje hižo pomjenowanja, na př. žorawka, žorawa a tymjenka, botanisce korektnje móžemy dodać adjektiw wulkojahodata. Pomjenowanje žorawka poćahuje so na mjeno ptaka – žorawja, podobnje kaž druhe němske pomjenowanje Kranichbeere. Mjeno tymjenka pak bjerje so wot městna, hdźež tute jahodki rostu – w tymjenjach, to rěka w bahnach abo žumpadłach. Ale kedźbu, tymjenki abo žorawki su smjerć kisałe, tola pječa wone pomhaja při zahorjenju pucherja abo močowych pućow.