Rěčny kućik dr. Anje Pohončoweje z wusyłanja 20.11.2013 „Zbožo“ z linguistiskeho wida

Što je zbožo? Filozofiske to prašenje a wotmołwy budu wšelake. Ja so dźensa tutomu prašenju wězo z rěčneho wida bližu. – Hižo w prasłowjanšćinje eksistowaše dźě słowo, na kotrež so naše dźensniše słowo zbožo wróćo wjesć hodźi a kotrež měješe woznam „bohatstwo, derjeměće, zbožo (– kaž je dźensa rozumimy)“; pozdźišo so w někotrych rěčach woznam konkretizowaše. Tak ma w pólšćinje zboże woznam „žito“. A w delnjoserbšćinje je zbóžo jenož hišće w zmysle skót znate; město hornjoserbskeho słowa zbožo wužiwa so tu němska požčonka gluka. W słowje zbožo tča dalše, nam dźensa derje znate słowa, na přikład Bóh a bohaty. Zbožo, Bóh, bohaty – tute słowa a jich woznam běchu potajkim w předstawach našich prjedownikow mjez sobu zwjazane: Z tym, štož maš, z twojim wobsydstwom abo bohatstwom, sej žiwjenske zakłady tworiš, zo by móhł derje a spokojnje a z tym snadź tež zbožowny žiwy być.