Rěčny kućik dr. Jany Šołćineje z wusyłanja 2.10.2013 čorny – něšto sčornić – někoho wočornić

Wólby do zwjazkoweho sejma su nimo. Tuchwilu jednaja politikarjo wo wulkej čorno-čerwjenej abo wo čorno-zelenej koaliciji, a pomjenowanje barby „čorne“ steji w podatym konteksće za křesćansku stronu CDU. Tu so potajkim w politiskim žiwjenju, we wólbnym boju abo tež we wopisowanju móžnych koalicijach z pomocu barbow wěste politiske wusměrjenje wopisuje. Dale wužiwa so wuraz „čorne blaki“, na přikład za z čornej barbu našmórane pasaže teksta, zo njebychu wjace čitajomne byli. Potom prajimy, zo su so jednotliwe słowa, linki abo cyłe wotrězki „sčornili“. Tak dóstanje potom prajidmo, zo něšto „čorne na běłym steji“ cyle nowy woznam. Negatiwny přisłód ma słowjeso „někoho wočornić“, štož rěka, zo wo někim špatnje rěčimy abo samo łžě rozšěrjamy. „Njewidźu wšak čornje…“ a so wězo nadźijam, zo sym ze swojim wopisowanjom barby tež „do čorneho trjechiła“, a w tutym zwisku dóstanje pomjenowanje barby potom tež zaso pozitiwny woznam …