Rěčny kućik dr. Sonje Wölkoweje z wusyłanja 28.08.2013 Šulski zachod

Mjeztym je wón hižo nimo, wulki podawk za našich šěsć- a sydomlětnych a jich swójby, jich prěni šulski dźeń. Němsce so na njón praji „Schulanfang“ abo „Schuleintritt“, ja znaju z Budyšina tež wuraz „Schuleingang“. A tón drje je tež kmótřił pomjenowanju, kotrež sym w zańdźenych tydźenjach husćišo słyšała a tež hižo w „Płomjenju“ čitała a kotrež so mi scyła njelubi, mjenujcy „šulski zachod“. Ně, to njeje mjeno za tón horco wočakowany dźeń, šulski zachod to su za mnje durje do šule. Dźěći pak swjeća skerje swój zastup do šule abo šulski zastup. A nětko, hdyž je swjedźeń nimo a šulska toboła hižo wjetšu rólu hraje hač cokorowa tita, chodźa jako šulscy nowačcy abo abejcejnicy, ABC-Schützen, kóždy dźeń do šule. Přeju jim, zo so jim tam lubi, zo prawje spěšnje a lochko čitać a pisać nawuknu a wšo druhe, štož čłowjek tak we wšědnym žiwjenju trjeba.