Rěčny kućik dr. Sonje Wölkoweje z wusyłanja 31.07.2013 Njebojće so!

Dale a husćišo čitam abo słyšu změrowace přispomnjenje: „Žadyn strach, to wšitko zaso budźe“. Tutón wuraz „žadyn strach“ je w hornjoserbšćinje nowša twórba po němskim „keine Angst“. To nam jara nazornje wuwědomja digitalny tekstowy korpus. W nim namakamy jeničce 14 přikładow za wuraz „Žadyn strach“ jako zawod na spočatku sady abo jako samostatne wuprajenje. Wšě tute přikłady su z časa po druhej swětowej wójnje. Za serbšćinu typiski a starši pak je wuraz „njeboj so“, kiž hodźi so gramatisce na narěčanu wosobu přiměrić, na přikład jako „njebojće so“ abo „njebojtaj so“: Njebojće so, to wšitko zaso budźe! Přikładow za tutón typ wurazow, w samsnej poziciji a funkciji, pokazuje nam korpus na wšě 234 a wone pochadźeja ze wšěch časowych wotrězkow, kotrež su w tekstach korpusa reprezentowane. W lisće z lěta 1928 změrowa na přikład Bjarnat Krawc Arnošta Muku, pokazujo na to, zo budźe před koncertom w Budyšinje jara rozbudźeny: „Njeboj so, ja sym hewak jara solidny.“