Rěčny kućik dr. Jany Šołćineje z wusyłanja 27.03.2013 *Kiće L. gratulować

Njedawno woswjeći serbski basnik Kito Lorenc narodniny, a mnozy jemu gratulowachu. Derje tak. Hdyž pak zasłyšach, zo chcyše něchtó Kiće Lorencej zbožo wupřeć, so moje rěčne začuće wobaraše. Čehodla? Mjena pomjenuja muske abo žónske wosoby a so tuž tež kaž muske abo žónske substantiwy deklinuja. Hačrunjež předmjena kaž Beno, Fryco, Kito abo Mato na –o kónča, tak kaž substantiwy neutruma tež, so wone tola kaž maskulina skłonjuja. A tak gratulujemy Benej, Frycej, Kitej abo tež Matej k narodninam. Hinak je to pola žonow, kiž rěkaja na přikład Hanka, Brita abo Margita, potom gratulujemy Hance, Briće abo Margiće k narodninam. Łoskoćiwe prašenje je deklinacija modernych cuzorěčnych holčich a hólčich mjenow, hdźež druhdy ani njewěš, kak so scyła wurjekuja. Tuž lubi słucharjo, njezabudźće na narodniny a gratulujće lubym swójbnym a znatym, na přiměrjene a dostojne wašnje a prošu tež w rěčnje korektnej formje!