Rěčny kućik dr. Anje Pohončoweje z wusyłanja 17.01.2018 Feststellschraube

Kóždy šuler trjeba za geometriju kružidło. Z nim hodźa so bjez problemow kruhi wšelakeho přeměra rysować. Za to so kónčk kružidła do nuloweho dypka lineala štapi, wotpowědna wulkosć so wuzwoli a potom so kruh rysuje. Zo njeby so při tym wulkosć změniła, móže so nastajeny radius z wosebitym šrubom sfiksować. Tutón šrub mjenuje so němsce "Feststellschraube", "Befestigungsschraube" abo tež "Klemmschraube", a serbsce? W terminologiskich zešiwkach za šulsku potrjebu stej zapisanej jako wotpowědnikaj připrěwny šrub a připrěwanski šrub. Adjektiw připrěwny je trochu njezwučeny a wustupuje drje jenož w šulskej terminologiji. Scyła zda so, zo je werb připrěć/připrěwać rědki; je w słownikach registrowany, ale w druhich tekstach jón lědma namakamy. W starym pomocnym terminologiskim słowniku je zapisany dalši serbski wotpowědnik za němske "Feststellschraube", kiž so mi wosobinsce najlěpje lubi, a to je připrěwka. Je to rjany přikład za tworjenje wotwodźenki jako serbski wotpowědnik za němsku zestajenku.