Rěčny kućik dr. Anje Pohončoweje z wusyłanja 24.05.2017 Knochenmark

W zašłych tydźenjach słyšachmy někotre přinoški wo darjenju "mozoweho kosćowca", z kotrehož pomocu hodźa so wšelake chorosće wuhojić. Dobre powěsće to su, ale to, štož je wotpowědna wosoba woprawdźe dariła, njebě žadyn "mozowy kosćowc". Ně, wona je dariła - němsce prajene - Knochenmark. Za wužiwanje praweho serbskeho wotpowědnika sej ani nowe słowo wumyslić njetrjebamy. Wšak prajimy němskemu "Knochenmark" prajimy serbsce hižo wjele lět "mozowc" (hlej na přikład do dwuzwjazkoweho němsko-hornjoserbskeho słownika), mjenje rozšěrjeny je wuraz "žro kosće". Mozowc je najwažniši krej tworjacy organ čłowjeka, kiž pjelni prózdny rum w kosćach; wotwodźene je słowo wězo wot mozow. Serbski wuraz "kosćowc" je něšto cyle druhe, su to mjenujcy wšitke kosće čłowjeka, němsce "Skelett" abo "Gerippe". Na spočatku citowany wopačny wuraz potajkim w serbšćinje žadyn prawy zmysł nima. - Štóž so rozsudźi za darjenje mozowca, móže z tym snadź žiwjenje jemu njeznatemu choremu čłowjekej wuchować. A tole je woprawdźe dobra wěc!