Rěčny kućik dr. Anje Pohončoweje z wusyłanja 21.09.2016 Ličba stupa

Přeco zaso zahnězdźa so w spisownej rěči misnjenja. Wustupuja tak husto, zo hižo njenapadnu. Dźensa měnju wobrot, zo ličba něčeho přiwza. Lubi čitarjo: Wšojedne, hač potrjechi to ličbu kemšerjow, wobydlerjow města abo něšto druhe - w kóždym padźe móže tuta ličba jenož stupać, chibazo tež přiběrać. Přiwzać móžemy noweho čłona do towarstwa, swójba móže dźěćo přiwzać, dobry poskitk móžemy přiwzać a podobne. W nawopačnym směrje prajimy, zo ličba woteběra abo spaduje, móže so tež pomjeńšić, nic pak wotewzać. Němskej werbaj "zunehmen" a "abnehmen", kotrejž stej tu takrjec kmótřiłoj, matej w serbšćinje rozdźělne wotpowědniki. Wuzwolenje praweho serbskeho słowa wotwisuje wot konteksta, kaž sym hižo runje pokazała. W tutym zwisku bych chcyła hišće dodać dalši woznam, mjenujcy nastupajo wahu. Tak ma prawje rěkać, zo je wona tři kila přibyła (nic: přiwzała) resp. tři kila wotbyła (nic: wotewzała), štož je za kóždu žonu zawěsće wjetše wjeselo.