Rěčny kućik dr. Anje Pohončoweje z wusyłanja 22.05.2013 financny – finančny

Wužiwamy w serbšćinje wšelake cuze słowa, mjez nimi su tajke kaž financy, konferenca, eksistenca. Wot nich móžemy wotwodźeć adjektiwy z pomocu přiwěška -ny. Při tym wustupuja warianty, mjenujcy: financny – finančny, konferencny – konferenčny, eksistencny – eksistenčny. Někotryžkuli z Was so snadź praša, kotra forma je nětko prawa. Forma na -č- (potajkim finančny, konferenčny atd.) je so wosebje po lěće 1945 pod čěskim wliwom rozšěriła. A słyšimy je dźensa zwjetša jenož wot staršich ludźi. Zasadnje stej wobej formje prawej, je wšojedne, hač praju finančny abo financny. Mjeztym pak wužiwaja so husćišo formy z c, potajkim Zetkamy so w konferencnym rumje, wojujemy wo eksistencne prawo; na to pokazuja tež nowše słowniki, hačrunjež tu jednotnje njepostupuja. Znajmjeńša rěka oficialne pomjenowanje wěsteho zarjada: financny zarjad. Apropos „financny zarjad“: Sće hižo Wašu „Steuererklärungu“ wotedali? Serbsce rěka to dawkowa deklaracija. Ale k tomu snadź druhi raz wjace.