Serbska rěč so wuwiwa – Rěčny kućik z dr. Janu Šołćinej, dnja 29.12.2021 Rěčny kućik - wobjed z třomi jědźemi

Nadźijomnje sće Wy, lubi słucharjo, rjane hody woswjećili a měrne swjate dny w kruhu swójbnych dožiwili. K hodownemu swjedźenju słuša wězo tež dobra jědź, a w tutym zwisku rěčeše njedawno něchtó wo třichodowym meniju. Njewěm, kak so Wam wjedźe, ale tu so moje rěčne začuće wobara. Přez znajomosć němčiny hnydom wěmy, zo bě młodostny měnił to, štož so jako „3-Gänge-Menü“ pomjenuje – potajkim jedna so wo wobjed z wjacorymi jědźemi. Hižo naši prjedownicy wědźachu, zo słušatej (citat): „(...) k porjadnemu wobjedej tež poliwka a pojědź“. Na tym so ničo změniło njeje, jenož zo wobjed dźensa hustodosć z pomocu požčonkow kaž menij abo dessert wopisuje. Wuraz pojědź namakamy w dwurěčnych słownikach jako ekwiwalent němskeje zestajenki „Nachtisch“. Jedna pak so tohorunja wo wotpowědnik němskeho słowa „Gang“ – a to při jědźi. Tuž móhli prajić, zo wobsteješe wobjed z třoch pojědźow abo zo bě to wobjed z třomi jědźemi. Přeju Wam, tež dalše rjane swjate dny z kulinariskimi chłóšćenkami – wšojedne, hač Waše menije z dweju abo z wjacorych pojědźow wobsteja!

dr. Jana Šołćina