Serbska rěč so wuwiwa – Rěčny kućik z dr. Janu Šołćinej, 31.03.2021 Rěčny kućik - (sej) rukawy wuhornyć

Tematika pandemije wobsah nowšich rěčnych kućikow wobwliwuje - tež dźensniši. Hižo kónc minjeneho lěta je Sakska zahajiła kampanju, zo by za šćěpjenje wabiła, a to pod nadpismom: „Sachsen krempelt die Ärmel hoch". Za naše medije nasta tuž prašenje za přełožkom do serbšćiny. Sej rukaw resp. rukawy wuhornyć je prajidmo, kotrež hižo z časa dźěćatstwa sem znaju. Přisłušnicy powójnskeje generacije dopomnja so snano na spěw, w kotrymž rěka: „Rukawy sej wuhorńmy, wuspěšnišo dźěłajmy!" W aktualnym konteksće pak je přełožk komplikowaniši. Sakska sej rukawy wuhornyć njemóže, wšako „kraj" tajke ani nima. „Saksojo sej rukawy wuhornu" je był namjet, hdźež móhli někotři kritizować, zo njejsu žony wuraznje a wosebje mjenowane. „Saksojo a Saksowki sej rukawy wuhornu" by dalša warianta była. Tuž lubi słucharjo, dajće so šćěpić - a njezabudźće, sej do toho rukaw wuhornyć!

dr. Jana Šołćina

________________

Tule móžeće sej awdijo tež hišće raz naposkać: