Serbska rěč so wuwiwa – Rěčny kućik z dr. Sonju Wölkowej, 18.11.2020 Rěčny kućik - Šćěpiwo
Hauptinhalt
22. smažnika 2011, 08:39 hodź.
Zašły tydźeń smy woloženi słyšeli wulkotnu powěsć: Kaž wupada, drje bórze k dispoziciji steji srědk, z kotrehož pomocu snano dalšemu rozpřestrěću korony zadźěwamy. Rěč je wo srědku k šćěpjenju. Po cyłym swěće slědźa wšak na wuwiću tajkeho srědka, kotremuž Němcy "Impstoff" praja. A serbsce. Wě to snano dr. Sonja Wölkowa?
Šćěpiwo
Dźensa je zaso korona moja tema. Rostu wuhlady, zo bórze budźe k dispoziciji srědk, kotryž pomha přećiwo rozpřestrěću tuteje chorosće, mjenujcy srědk k šćěpjenju. Po cyłym swěće slědźi wjac hač 200 firmow na wuwiću tajkeho srědka z najwšelakorišimi metodami a wulkimi financielnymi wudawkami. Po najnowšich informacijach je 47 tajkich maćiznow hižo we wupruwowanskej fazy prěnjeho hač do třećeho stopnja. W serbskich medijach sym storčiła w tutym zwisku na wotwodźenku šćěpiwo. Je to jadriwy wuraz, wotwodźenka, kiž je tworjena po dosć rozšěrjenym słowotwórbnym modelu. Zakład je werb šćěpić, kotremuž doda so sufiks abo přiwěšk ~wo. Dalše přikłady za samsne wašnje tworjenja su paliwo - to štož palimy, hnojiwo - to z čimž hnojimy, ćěriwo - štož ćěri mašiny a awta, tepiwo - z čimž tepimy. A nic naposledk je na samsne wašnje tworjene pomjenowanje za jara woblubowany napoj, mjenujcy piwo - něšto štož pijemy. Štó by sej myslił, zo je na tute wašnje šćěpjenski srědk - šćěpiwo - za rěčespytnikow přiwuzny z piwom?
dr. S. Wölkowa
