Rěčny kućik z dr. Janu Šołćinej , dnja 13.11.2019 Sej rjane popołdnjo popřeć

Njedawno so mje młoda žona wopraša, što kónc tydźenja činju a (citat): "(...) kak njedźelniše popołdnjo zabiju". Wězo hnydom spóznajemy, zo je tutomu wuprajenju kmótřiła němska formulacija "die Zeit totschlagen". Wona wopisuje situaciju, zo tak prawje njewěš, što w swojim swobodnym času činiš. Sprawnje prajene - mi wosobinsce so jenož zrědka hdy wostudźi! Snano pak někotři wotydźenja po swjatoku abo tež njedźelu njewědźa, što ze swojim swobodnym časom započeć. A runje tohodla poskićuja nam serbske medije "serwis" a informuja, hdźe so kotre zarjadowanje wotměwaja, što móhli sej za popołdnjo předewzać, dokal sej dojěć abo kak móhli popołdniši čas zmysłapołnje wužiwać. Njetrjebamy tuž ženje "popołdnjo zabić", ale móžemy je skerje na rjane wašnje wuhotować, sej rjane popołdnjo popřeć abo tež rjane popołdnjo přežiwić!