Rěčny kućik z dr. Janu Šołćinej, dnja 14.08.2019 Sitzsack

Njedawno mje serbska wučerka zazwoni. Wona dźěłaše na přełožkach wučbych materialijow a so mje wopraša, kak móhli němsku zestajenku "Sitzsack" do serbšćiny přełožić. W němsko-hornjoserbskich słownikach žadyn zapis namakała njebě, štož na to pokaza, zo jedna so tu wo nowšu leksiku. Z tematiskeho wobłuka meblow stej w eksistowacych słownikach mjez druhim hižo zapisanej róžk k sedźenju jako wotpowědnik němskeho słowa "Sitzecke" abo tež ławka k sedźenju za němske "Sitzbank". Tajki měch k sedźenju namakamy zwjetša w dźěćacych stwach abo w stwach młodostnych. Wón hižo formu tradicionelneho stólca nima, ale jedna so wo měch z pisaneho płata, kiž je zwjetša ze styropurowymi kulkami pjelnjeny a kiž so formje ćěła přiměri - a skerje k wotpinanju słuži. Móžemy tuž prajić, zo dźěći na sedźenskim abo na sydanskim měchu wotpočuja, tež, hdyž tam poprawom hižo njesedźa, ale nimale leža - haj druhdy samo lěhaja. Jedna so tuž wo leksikalisku nowotwórbu moderneho hornjoserbskeho słownistwa.