Rěčny kućik dr. Janu Šołćinej, dnja 24.07.2019 Sej něšto naposkać

Bohatosć našeje rěče so mjez druhim w mnohich woznamowych wariantach serbskich słowjesow pokazuje. Přikład za to je werb "naposkać", wo kotrehož nałožowanju so njedawno mjez Serbami horco diskutowaše. Wosoba A bě měnjenja, zo wužiwa so "naposkać" jenož w zmysle hroženja, potajkim w zwisku ze swarami, kaž na př. "Nó, to móžeš sej doma něšto naposkać!". Tomu pak tak njeje. W hornjoserbskim tekstowym korpusu je tójšto přikładow za neutralne konteksty, kotrež wotpowěduja němskemu ekwiwalentej "sich etwas anhören", kaž mjez druhim: "To naposka sej žona starosće druheje" a "Zajimcy móžachu sej krótke informaciske teksty z pomocu słuchatkow naposkać [...]" abo tež: "W našej swójbje bě cyle samozrozumliwe, sej tačele z tutej rjanej hudźbu naposkać." W hornjoserbsko-němskim słowniku je pod hesłom naposkać tež hišće dalša warianta słowjesa z němskim woznamom "genug hören" zapisana, kotraž wopisuje zjaw, so něčeho naposkać, kaž na př. "[...] běch dołho dosć so naposkał teje hary". Nadźijam so, zo njejsće so rěčnych kućikow naposkali, ale zo so tež přichodnje za přinoški z rěčespytnej tematiku zajimujeće!
Dyrbiće jenož na slědowacy link kliknyć!