Mjeńšina serbšćiny 24.07.2024 z dr. Anju Pohončowej Rěčny kućik - Superlěto wólbow/ wólbne superlěto

Lětsa su wobydlerjo Sakskeje namołwjeni, so na wjacorych wólbach wobdźělić. W juniju wotměchu so hižo wólby do EU-parlamenta, do wokrjesneho sejmika kaž tež do gmejnskich radow. A tam, hdźež maja wjesne rady, smědźachu wobydlerjo hišće štwórty hłosowanski lisćik wupjelnić. W septembru sćěhuja hišće wólby do Sakskeho sejma. Tohodla je w medijach husto rěč wo “das Superwahljahr”. A serbsce? Słyšach jónu wuraz „superwólbne lěto“. Němska třidźělna zestajenka „Super-Wahl-Jahr“ je so prosće formalnje přenjesła do serbšćiny, ale prawje tworjene tohodla njeje. Z předwěškom „super“ zesylnjamy zakładne słowo: supermudry rěka, zo je něchtó jara mudry a superhit rěka, zo spěw njeje jenož jara woblubowany, ale přewšo woblubowany. Serbski wotpowědnik za němske „Wahljahr“ je wólbne lěto, zakładne słowo je w tajkim pomjenowanju substantiw lěto. A na to měł so předwěšk super poćahować. Tohodla je prawy serbski wotpowědnik za němske „Superwahljahr“ – tež hdyž to trochu njezwučene klinči – pak superlěto wólbow abo wólbne superlěto.