Rěčny kućik 29.05.2024 z dr. Leńku Šołćic Rěčny kućik - Špocěrom hić

Runje nětko w nalěću při rjanym wjedrje dźemy rady a husto špocěrom. Za spisownorěčne so wuchodźować abo wujězdźować praju we wobchadnej rěči špocěrom hić abo špocěrom jěć. Někotre přikłady ze špocěrom namakamy tež w serbskej literaturje, na př. w powědančku „Sobotu wječor doma“ Angele Stachoweje: Pozdźišo dźěše wona hišće raz sama špocěrom, na pućach mjez łukami … Wězo je konstrukcija z němčiny přewzata, ale wo wjele zajimawša je kóncowka -om pola špocěrom, kotraž dopomina na instrumentalnu kóncowku maskulinych substantiwow, kaž w z lodom, z kolesom a p. Nimamy pak pola špocěrom hić žanu prepoziciju. Z přikładom bychu móhli za tajku formu dźensniše adwerby kaž změrom abo spokojom być, wobstejace z něhdyšich substantiwow, kotrež su z prepoziciju hromadźe zrostli, z měrom k změrom. Tež špocěrom móžemy potajkim jako adwerb wobhladować.

dr. Leńka Šołćic