Rěčny kućik 08.05.2024 z dr. Anju Pohončowej Rěčny kućik - žónske swójbne mjena

Za lěto je tak daloko! Potom móža sej holcy a žony swoje serbske swójbne mjeno cyle oficialnje do wupokaza zapisać dać. Dotal wšak dyrbjachu so z muskej formu spokojić. Tak rěkaše dotal Hanka Šołćina po wupokazu Hanka Šołta. Z tym pak budźe – kaž hižo prajene – bórze kónc a wona Hanka by směła potom tež oficialnje rěkać a so pisać po serbskim wašnju: Hanka Šołćina. W serbšćinje mamy wšak tež hišće wosebitu kóncowku za holcy a njewudate žony, potajkim Šołćic resp. Krawcec. Dorosćena njewudata žona móže z nowym zakonjom sama rozsudźić, hač chce tutu kóncowku wobchować abo sej kóncowku za wudate žony wuzwolić, potajkim Šołćina abo Krawcowa. Tute rjadowanje wotbłyšćuje wašnje, kotrež je so w zašłych lětach wuwiło a poskićuje žonje wšu swobodu, kak chce ze swojim serbskim mjenom wobchadźeć. A jeli maja němske hamty někajke ćeže z Wašim serbskim mjenom, móžeće so Wy, lube Serbowki, na Serbski institut wobroćić. Rěčespytnicy wustajeja wotpowědny wěcywustojny list a móža prawosć serbskeho mjena wobkrućić.

dr. Anja Pohončowa