Serbska rěč so wuwiwa – rěčny kućik z dr. Leńku Šołćic, 13.09.2023 Rěčny kućik - Neple z polećom

Štó kisałe neple, potajkim neplacu abo běrnjacu solotej rady njejě. A k tomu snano praženu kołbasku. Klasiske kisałe neple znaju ja ze smjetanowej jušku, kisałej kórku, cyblu a wězo selu a popjerom, a snano da tón abo tamny hišće něšto druhe k tomu, za wosebity abo swójski šmak. W lěću, a runje w tajkich horcych dnjach kaž njedawno, so ći tajkeje ćežkeje soloteje skerje nochce, ale chceš něšto wochłódźace a čerstwe-juškojte. A tohodla dawaja pola nas w lěću husto neple z polećom, tak prajene lětnja neplaca solotej. Tute njejsu ze smjetanu naměšane a tež nic z kisałej kórku, ale z čerstwej zelenej kórku ze zahrody, trochu wolijom a kisałom, kusk muki ze zwarjenej wodu a selu a popjerjom. A to słodźi a wokřewja, hdyž je horco. Hdyž pytamy w soblexu za słowom poleće, to namakamy je z woznamom ‘Brühfutter’, potajkim žratwa za domjacy skót, kotraž so z horcej wodu napari. Z horcej wodu a w njej zaměšanej muku poliwamy tež tute neple z polećom.))