Serbska rěč so wuwiwa – rěčny kućik z dr. Anju Pohončowej, 07.06.2023 Rěčny kućik – horjeńca

Na mejskej njedźeli po swjedźenju donjebjesspěća, słyšachmy w katolskich Božich mšach w prěnim čitanju sćěhowacu sadu z japoštołskich skutkow: “Jako tam dóńdźechu, dźěchu do horjeńcy a wostachu tam.” Horjeńca – što ha móže to być? Na druhich městnach w bibliji wužiwachu přełožowarjo wšelake wurazy: hornja komor(k)a, hornja stwa, poschod – w přełožku po Lutheru jewi so pak zwjetša łubja; ně. “Obergemach”. Tajke hornje stwy natwarichu so tehdy husto na płonych třěchach chěže abo palasta a wužiwachu so mjez druhim za modlenje abo wotpočnjenje. Słowo horjeńca w zmysle ,hornja stwa‘ resp. ,knježa stwa‘ je jeničce w Pfulowym słowniku z lěta 1866 zapisane. Porno tomu připisuja jemu w druhich słownikach woznam ,domjaca‘ abo ,wyša słužowna‘. We woběmaj padomaj jedna so wo zrědka wužiwane a dźensa zestarjene słowo. A štó wě, snano rozsudźi so přichodny wobdźěłar biblije tu horjeńcu wuměnić ze zrozumliwišim słowom a pisa wo hornjej stwě abo kaž ewangelscy Serbja wo łubi. Potom so čitar bibliskeho teksta abo připosłuchar na kemšach hižo njepraša, dokal su ludźo šli a hdźe su wostali.))

dr. Anja Pohončowa