Serbska rěč so wuwiwa – Rěčny kućik z dr. Janu Šołćinej, dnja 19.01.2022 Rěčny kućik - serbska rěč a genderowanje

Rěč a genderowanje - to je aktualna tema, kotraž sylnje polarizuje. Wo trěbnosći abo njetrěbnosći mjenowanja žónskich formow so wězo tež w zwisku ze serbšćinu diskutuje. Hdyž přeju Wam, lubi słucharjo, dobre ranje, z tym wuraznje tež wšitke žony měnju. Njetrjebam to pisomnje z hwězdźičkami, z dwudypkom abo z wulkimi pismikami woznamjenjeć abo ertnje stajnje wobě formje mjenować. Sady, kaž na př. "Ministerka bě z hosćom našeje konferency" njebych změniła, a tworjenje žónskich formow kaž "hóstka", němsce "Gästin" mam za přehnate. W serbšćinje iritěrowace by tajke postupowanje tež w zwisku z požčonkami było, na přikład w sadźe "Młoda serbska spěwarka bě star na jewišću". Genderowanje muskeje formy "star" na "starka" by samo zamyliło, dokelž je "starka" pomjenowanje za husycu, němsce "Muttergans" a w delnjoserbšćinje za wowku - a tajke wopisowanje zawěsće njeby w zmysle młodeje serbskeje spěwarki było! Tuž so wosobinsce pospytow genderowanja w serbšćinje wzdam a so radšo z druhimi rěčnymi problemami zaběram!

dr. J. Šołćina