Powěsće Serbskeho rozhłosa

Lětsa poda so jutrońčku w Hornjej Łužicy w dźewjeć procesionach zaso tójšto křižerjow na puć - trochuje so, zo budźe to znowa na 1.500. Po informacijach nawodow a kantorow budźe we wšěch hornjołužiskich procesionach 63 nowačkow po puću. 32 křižerjow dóstanje slěborny wěnčk. Drje jeničkeho złoteho jubilara změja w serbskim dźělu Kulowskeho procesiona z Ambrožom Brězanom. W Budyskim procesionje maja noweho nošerja swjateho křiža. Tomaš Richter přepoda nadawk po wjele lětach swojemu synej Maksej, z kotrymž tež hromadźe w porje jěcha. Baćońscy křižerjo maja nowe křižerske knižki z přidatnymi kěrlušemi, dotalne su mjeztym wušli. Tež we Wostrowcu při hranicy k Pólskej so jutře něhdźe 70 křižerjow w tamnišim procesionje wobdźěli. Lětušu křižersku rozprawu słyšiće jutrownu póndźelu w připołdnišim wusyłanju Serbskeho rozhłosa.

Serbske młodźinske towarstwo Pawk je dale na čole Młodźiny europskich narodnych skupinow MENS zastupjene. Na hłownej wólbnej zhromadźiznje w Opolu wolichu Filipa Budarja za městopředsydu MENS. Wón je w přichodnymaj lětomaj za nutřkowne naležnosće organizacije zamołwity. Do toho rozžohnowaštaj so Felicitas Touvenotec a Krystof Grofa po štyrjoch lětach z předsydstwa MENS.

Towarstwo přećelow Serbow w Praze organizuje jutrońčku znowa jězbu do Łužicy. Kaž zamołwići zdźěla, wotjědźe bus z Prahi najprjedy do Radworja, potom do Ralbic a Róžanta a naposledk do Chrósćic. Towarstwo přećelow Serbow hižo někotre lěta tajke jězby na jutrońčku poskićuje. Tež k 800. róčnicy gmejny Chrósćicy je jězba do Łužicy planowana - a to kónc tydźenja wot 14. do 15. junija.

Bukečanska wosada ma k jutram zaso hosći z Awstralskeje. Skupina něhdźe 15 potomnikow serbskich wupućowarjow je do Hornjeje Łužicy přijěła. Kaž Bukečanski farar Thomas Haenchen zdźěli, podadźa so na jězbu po wsach wosady a wobdźěla so na jutrownym spěwanju we Wuježku a na jutrownych kemšach w Bukecach. Tež křižerjow chcedźa sej wobhladać. Potomnicy serbskich wupućowarjow w Awstralskej maja hižo tójšto lět styki z Bukečanskej wosadu a su hižo wjacore jězby do domizny prjedownikow organizowali.

Saněrowanje a přetwar šulskeje awle w Hamorje so dlije. Za rozdźělenje planowanskich wukonow za nošnik, wohnjoškit a statiku njeje so w gmejnskej radźe žana wjetšina namakała. Planowanja za saněrowanje awle a wutworjenje dweju rjadowniskeju rumnosćow su so hižo 2019 zahajili. Cyłkowne kóšty saněrowanja a přetwara trochuja na 1,3 miliony eurow. Gmejnske zarjadnistwo chce nětko pruwować, hač hodźi so předewzaće přez program "Schul-Invest" spěchować. Paralelnje chce nošerske towarstwo swobodneje šule pruwować, hač móža so přidatneju rjadownjow wzdać.

Twar přistawa za łódźe při Parcowskim jězorje steji na hračkach. Toho boji so zaměrowy zwjazk Łužiska jězorina. Kaž jednaćel zwjazka rjekny, zaplanuje Sakska radikalnje mjenje spěchowanskich pjenjez hač poprawom předwidźane. Město sydom milionow eurow je za wutwar poskitkow při něhdyšich jamach klětu jenož hišće 1,45 milionow eurow předwidźane. Z tym je twarski projekt chutnje wohroženy, warnuje Budyski krajny rada Udo Witschas (CDU). Poł miliona eurow bu hižo do planowanja přistawa inwestowane. 2026 měješe so twarjenje zahajić. Jeli přistaw njenastanje, by Parcowski jězor wot wšěch ze sobu zwjazanych jězorow jenički był, hdźež łódźe přistawić njemóža, štož by turizmej škodźało.