Powěsće Serbskeho rozhłosa

Ličba kemšerjow je loni w nimale wšitkich serbskich katolskich wosadach biskopstwa Drježdźany-Mišno lochce přiběrała. Kaž ze statistiki, kotruž je biskopstwo tele dny wozjewiło, wuchadźa, je ličba kemšerjow w Baćonju na wjac hač 70 procentow stupała. To je plus nimale 20 procentnych dypkow. Jako jenička ze serbskich wosadow je porno tomu Radworska loni 66 kemšerjow mjenje měła. Najwjac křćeńcow mějachu loni z 29 w Chróšćanskej wosadźe, najwajc wěrowanjow z 11 w Ralbicach. Dohromady je ličba wěriwych w serbskich wosadach biskopstwa Drježdźany-Mišno loni wo wjace hač 220 woteběrała.

We Wodowych Hendrichecach je so pjaatk 57. Olympiada serbskeje rěče zakónčiła. 59 šulerjow šestych lětnikow z Hornjeje a 30 šulerjow z Delnjeje Łužicy wěnowaše so na třidnjowskej olympiadźe temje lěs. W skupinje maćernorěčnych bu šulerka Serbskeho gymnazija Bettina Knopec wuznamjenjena. W rěčnej skupinje 2 přesadźi so Katka Wasnerec - tohorunja šulerka SGB –, mjeztym zo bě Nina Thieme ze Serbskeje wyšeje šule w Budyšinje najlěpša w skupinje serbšćinu-wuknjacych. Nimo nastawka, kotryž dyrbjachu šulerki a šulerjo samostatnje napisać, wudźěłachu woni tež přednoški w skupinach.

Město Wojerecy ma swój plan wo personalu přepruwować dać. Nadawk ma eksterna firma přewzać. To je měšćanska rada na swojim minjenym wuradźowanju wobzamknyła. Firma ma tuž potrjebu města na personalnych městnach w kóždym jednotliwym wobłuku zarjadnistwa analyzować a ze zarjadnistwami městow jenakeje wulkosće přirunować. Zaměr je přestrukturowanje, rěka z měšćanskeje rady. Předewšěm ma pruwowanje wujewić, hač móža we Wojerecach swójski fachowy wobłuk za měšćanske wuwiće wutworić a hač trjebaja za to přidatny personal.

W měrcu bě we wokrjesomaj Budyšin a Zhorjelc 20.876 ludźi bjez dźěła. Kaž zdźěli Agentura za dźěło w Budyšinje je to 353 bjezdźěłnych mjenje hač w zašłym měsacu. Z tym zniži so kwota bjezdźěłnosće na 7,6 procentow. Naprašowanje za personalom je dale skerje zdźeržliwe, rjekny wjednica Budyskeje dźěłoweje agentury Marion Richter. Zo by so to změniło, trjeba hospodarstwo zaso rozmach. To pak tuchwilu wotwidźeć njeje, tak Richter.

Saněrowanje Měšćanskeho dźiwadła w Kamjencu je zakónčene. Kaž zdźěli rěčnik Lessingoweho města Thomas Käppler, móža so rumnosće wot spočatka apryla zaso wužiwać. Mjez druhim su wohnjoškit polěpšili a nowe wuchowanske puće wutworili. Nimo toho su w twarjenju tepjenje, elektriku a přewětrjenje dospołnje ponowili. Tež třěcha bu z wulkeho dźěla wobnowjena a fasada je nowu barbu dóstała. Twarske naprawy su něhdźe dwaj milionaj eurow płaćili. Dwě třećinje stej spěchowanske pjenjezy z fondsa za natwara městow.

We wjacorych měšćanskich dźělach Wittstocka na sewjeru Braniborskeje su spočatk tydźenja dwurěčne wjesne tafle připrawili. Dohromady 18 měšćanskich dźělow kaž tež dwaj gmejnskej dźělej maja nětko nimo němskeho mjena na tafli delnjoněmske mjeno stejo. Delnjoněmčina, tež „platt“ mjenowana, je jako jenička regionalna rěč Němskeje škitana, je to swójska germanska rěč, kotraž je z jendźelšćinu a frizišćinu přiwuzna. Wona so tuchwilu we wosom zwjazkowych krajach rěči. 2022 je Braniborski krajny sejm škit a hajenje delnjoněmskeje rěče do wustawy přiwzał.