Powěsće: štwórtk, 17.04.2025

Pjekarjo w Hornjej Łužicy su spokojom z lětušimi skazankami tradicionalnych kmótřiskich całtow k Zelenemu štwórtkej. Přez 400 kmótřiskich całtow je pjekar Jeremias z Wulkeje Dubrawy lětsa napjekł. Z tym je ličba skazankow přirunujo z lońšim znowa přiběrała. Wjetšina kupcow přeje sebi makowe całty. Pola Šołćic w Róžeńće hinak wupada: tam so husćišo słódke kmótřiske całty z cokorowej glazuru skazaja, lětsa něhdźe telko kaž kóžde lěto. W Zahrodnikec pjekarni w Chrósćicach hižo cyły tydźeń kmótřiske całty pjeku, tohorunja přewažnje słódke. Nadpřerěznje wjele skazankow dla wjesela so přez podpěru wandrowskeje pomocnicy. Pjekar Brězan z Rakec napječe lětsa něhdźe 100 kmótřiskich całtow we wšelakich wulkosćach a družinach, kiž su we wšěch Brězanec filialach na předań.

W Stróži pola Rakec nastawa nowe twarjenje wohnjoweje wobory. Za tute je gmejnska rada srjedu wjacore twarske nadawki rozdawała, a to bjezwuwzaćnje firmam z wokoliny. Nimo toho je so tež za něhdźe 70.000 eurow wobnowjenje dróhi blisko Kačeje Korčmy wobzamknyło. Dale radźićeljo diskutowachu, što móhli přećiwo šmóranjam na zjawnych twarjenjach a wobchadnych taflach činić. Namjetowaše so na přikład fonds, přez kotryž by gmejna dosć pjenjez za wotstronjenje šmóranjow měła.

Kulow ma noweho jednaćela komunalneho bydlenjotwarskeho drustwa. Wot klětušeho přewza tutón nadawk Thomas Werner. Jeho předchadnika dyrbjachu wotwołać, dokelž je zrěčenje z nim wuběžało. Tohorunja jednohłósnje přiwza měšćanska rada srjedu nowy hospodarski plan we wysokosći 11 milionow eurow, kiž je so formality dla znowa wobzamknyć dyrbjał. Dale zniži město Kulow swójski podźěl nošerjow pěstowarnjow w měsće a wokolnych wsach wot 2,5 na 1,75 procentow. Přičina je, zo maja nošerjo stupacych kóštow dla financielne ćeže. To potrjechi tamnišu katolsku wosadu kaž tež křesćansko-socialny kubłanski skutk (CSB), kiž wobhospodarja pěstowarni w Kulowje a Sulšecach.

W Chrósćicach su so srjedu wječor, kaž kóžde lěto w martrownym tydźenju, křižowe puće procesionow na kěrchowje kročili. Wěriwi běchu mjez druhim z wosadnych wsow Hórki, Pančicy-Kukow, Worklecy a Smječkecy pěši w procesionach do wosadneje wsy přišli, a su so potom we wotstawkach podłu postaćow křižowy puć modlili. Lětsa su ministranća přichadźacych witali a tež přewodźeli. Chróšćanska wosada je jenička mjez serbskimi katolskimi wosadami, kiž ma křižowy puć na kěrchowje a tute nabožne wašnje haji.

Na třěchach garažow na dworje Serbskeho domu w Budyšinje je wotnětka fotowoltaikowa připrawa. To zdźěli Załožba za serbski lud. Fotowoltaika ma pomhać, Serbski dom z milinu zastarać. Dohromady 51 platow nadźěła nimale 23 Kilowatt-Peakow. Z tym chcedźa běžne kóšty za milinu, kiž so w Serbskim domje přetrjeba, jasnje znižić. Wo wulkosći připrawy njeje Załožba sama rozsudźić směła, ale dyrbješe so po přetrjebje miliny domu měć. Nadbytk miliny z připrawow njesmě so mjenujcy předać.