Powěsće: wutoru, 15.04.2025

W Miłorazu su hač na jednu ležownosć wšě domske a statoki wopušćene. To zdźěli milinowy koncern LEAG. Dalša swójba je ležownosć drje přepodała, ale jich přećah so z wosobinskich přičin dliji. Koncern liči z přepodaćom poslednjeho wobsydstwa w běhu tuteho lěta. Přijězdowa dróha ze susodneho Slepoho je hižo za zjawny wobchad zawrjena. Miłoraz je poslednja wjes w sakskich brunicowych rewěrach, kiž ma so zhubić. Najwjace wobydlerjow je do nowonatwarjeneho sydlišća w Slepom přećahnyło. LEAG dale z toho wuchadźa, zo brunicu pod Miłorazom za Hamorsku milinarnju wotbagruja.

Lětsa so w Šunowje žane jutrowne reje njewotměja. Na naprašowanje zdźěli wobsedźer Šunowskeje fabrikskeje hospody, Tomaš Wowčerk, zo leži přičina w kopjenju terminow. Tak so w dnjach po jutrach pola nich wotměja křižerska bjesada a swójbne swjedźenje po prěnim swjatym woprawjenju w Ralbičan wosadźe. Budźe to prěni raz po lětdźesatkach, zo jutrońčku w Šunowje jutrowne reje njebudu.

Z něhdźe 300.000 eurami sakskeho spěchowanja móže so w Budyskim wokrjesu 16 projektow za bjezbarjernosć zwoprawdźić. Pjenjezy su z programa "Najlubše městna za wšěch". Kotre projekty so podpěraja, je wokrjes we wuskim wothłosowanju z wokrjesnej społnomócnjenej za zbrašenych rozsudźił, zdźěli krajnoradny zarjad. Tak dóstanje na přikład kulturny a towarstwowy dom Konjecy-Šunow bjezbarjerny přistup, a we Łazu so pola ewangelskeje cyrkwje bjezbarjernosć zachoda stwori.

Towarstwo za wuwiće na kraju we Łužiskej jězorinje spěchuje ideje młodźiny z cyłkownje 8.000 eurami. Z wubědźowanjom pod hesłom "Młodźina hiba kónčinu" pyta přinoški a projekty w zwisku z rjemjesłom, demokratiju, runoprawosću a tradiciju. Na wubědźowanju wobdźělić móža so skupiny, towarstwa a druhe iniciatiwy młodych ludźi w starobje 14 do 25 lět. Jury wuzwoli najlěpše ideje a přepoda 15 mytow. Kónc požadanja je kónc awgusta.

Zapadnje Wulkich Ždźarow zahaja wutoru twarske dźěła za nowy móst přez Wojerowsku Čornicu. Z tym ma so dotrjebany móst z lěta 1972 narunać. Hižo w přihotach na twar su tam štomy pušćeli. Nětko so woda najprjedy raz do rołow powjedźe, prjed hač so stary móst zwottorha a nowy natwari. Za to je trěbne, dróhu dospołnje zašlahać, kaž zdźěli krajny zarjad za dróhotwar a wobchad. Wobjězdka powjedźe po B96 hač do Mučowa, dale na směr Kulow. Kónc lěta ma nowy móst hotowy być. Projekt płaći 1,7 milionow eurow.

Wjacezaměrowy dom při sportnišću we Wochozach so na zetkawanski centrum přetwari. Hamorska gmejnska rada je nadawki za přetwar přepodała na zawody z Běłeje Wody, Krušwicy a Hamora. Mjez druhim matej so třěcha a tepjenje wobnowić. Projekt płaći cyłkownje 200.000 eurow. Hamorska gmejnska rada so nadźija, zo Sakske ministerstwo za regionalne wuwiće 75 procentow kóštow za přetwar spěchuje. Po ponowjenju chce Hamorska gmejna zetkawanski centrum Wochožanskemu wjesnemu klubej za wužiwanje přepodać.