Powěsće: srjedu, 16.04.2025

Społnomócnjena sakskeho knježerstwa za naležnosće Serbow je wotnětka Franciska Brechowa. Za nowe městno je ju sakski kabinet wutoru pomjenował. Kaž w nowinarskej zdźělence rěka, zmóžni to wuše zhromadne dźěło ze wšěmi ministerstwami. Społnomócnjena budźe zamołwita za ressorty přesahowacu koordinaciju serbskich prašenjow w knježerstwje. Ma być partnerka za serbske institucije a zastupjerjow serbskich zajimow, za Braniborsku a Zwjazk, za komuny w serbskim sydlenskim rumje a europske institucije. Kulturna ministerka Klepschowa rjekny, zo je sej wěsta, zo budźe Franciska Brechowa sylny hłós za Serbow, wšako je w Serbach wotrostła, Serbski gymnazij absolwowała a nazhonjenja w krajnym zarjadnistwje zběrała. W zwisku z jeje pomjenowanjom zarjaduje so w ministerstwje běrow z dr. Madlenu Malinkowej jako jednaćelku, kotraž je nadal zamołwita za serbske naležnosće.

Hornjołužiske kliniki planuja strowotniske mini-centrumy za kónčiny na kraju. Hdźež njeje wjac žanych domjacych lěkarjow, móhli chorobne sotry, podpěrani wot kumštneje inteligency, pacientow přepytować a jich mediciniske zastaranje přihotować. Fachowi lěkarjo móhli so při potrjebje přišaltować. Ze studiju so nětko přepytuje, kak móhło so tole w Biskopičanskej kónčinje zwoprawdźić. Při tym dźe mjez druhim wo prawniske aspekty: što dyrbjało so w zakonjach změnić, zo by tajke něšto scyła móžne było, a kotre móžnosće bychu lěkarjo telemediciny woprawdźe měli, hdźe su hranicy a hač hodźa so tute ewentualnje přesuwać.

Delegacija Domowiny a Chróšćanskeje gmejny wobdźěli so srjedu, w Przewózje w Pólskej na spominanju składnostnje 80. róčnicy překročenja Nysy kónc druheje swětoweje wójny. Na tutym 16.aprylu je tomu 80 lět, zo su wojacy Druheje armeje Pólskeje překročili Łužisku Nysu, štož bě spočatk pólskeje ofensiwy. Tuta wjedźeše pozdźišo k wuswobodźenju Šleskeje wot němskeje wobsadki. W Dolinje smjerće pola Kukowa, pola Zejic a w Hórkach je sta pólskich wojakow zahinyło. Lětsa kónc apryla wobdźěli so na 200 hosći z Pólskeje na spominanju při Chróšćanskim pomniku za padnjenych Polakow, mjez nimi někotři z jich potomnikow.

Lěsna železnica Mužakow startuje Wulki pjatk zaso do noweje sezony. Přez jutrowne swjate dny pojědźetej ćahaj z historiskej parnej lokomotiwu. Přidatnje so muzej železnicy wotewrěje, rjekny nawoda jězbneho wobchada. Tež saněrowanske dźěła so pokročuja. Na čarje Běła Woda - Mužakow su dźěła hač k dwórnišću w Krušwicy wotzamknjene. Na čarje hač k Ćežkej horje maja so hišće poslednje dźěła dodźěłać. Cyłkowna čara Běła Woda - Kromoła ma kónc lěta 2026 hotowa być. Kóšty wučinja něhdźe šěsć milionow eurow, financuja so z pjenjez za strukturnu změnu.

Dźewjeć temowych milow podłu třoch kilometrow kołopuća přez historiski centrum - z tym wabi Kamjenc na swój swjedźenski kónc tydźenja w meji k 800. róčnicy. Kaž město wutoru zdźěli, wočakuja publikum na přikład hudźbne programy non stop na štyrjoch wšelakich jewišćach - mjez dźesatkami wuměłcow wustupi tež serbska skupina Popsorben. Dalše ćežišća budu prezentacije wohnjowoborneje techniki a policije kaž tež swójbny centrum při Krabatowym hrajkanišću.