Powěsće: póndźelu, 14.04.2025

Nimale štwórćina zastupnych lisćikow za lěćne dźiwadło w Budyšinje je předata, je to wjace hač 8.000 kartkow. Kónc tydźenja je so předpředań započała. Někotři kupcy stejachu hižo rano šesćich při kasy, kotraž je připołdnju jědnaćich wotewriła. Lětsa předstaja na lěćnym dźiwadle w Budyšinje musical "Alice im Wunderland". 35 wustupow su planowali, dwaj stej ekstra za swójby.

Rejowanska hra "Smy! - Sym?" Serbskeho ludoweho ansambla je so njedźelu posledni raz w tutej hrajnej dobje w Budyšinje pokazała. Inscenaciju pod režiju Gundule Peuthertoweje, praji medijowy rěčnik Stefan Cuška-Malink, pokazachu rejowarjo a rejowarki dohromady šěsć razow w Budyšinje a Choćebuzu. Předstajenje zaběraše so z tym, što woznamjenja być serbski. W pytanju za wotmołwami su so ludźi z Hornjeje a Delnjeje Łužicy w interviewach k serbskim temam naprašowali. Z toho wotwodźowaše režiserka maćiznu za wuwiće choreografijow.

Na wšelakich městnach srjedźneje Łužicy běchu kónc tydźenja dojutrowne zarjadowanja. Rowniske jutrowne spěwarki a Slepjanski dźěćacy ansambl su na přikład wobrubili jutrowne wiki w Brězowce, hdźež so tež debjerjo jutrownych jejkow prezentowachu. Jubilejne 30. wiki mějachu w Nowej Łuce pola Wojerec. Tam wustupištej z programom wjesna dźěćaca skupina a rejowanska dźěćaca skupina ze Židźinoho. Tež w Delnim Wujězdźe su kónc tydźenja jejka debili. Wjace hač 100 wopytowarjow tam bě, połojca z nich je sobu činiła. Rěčny motiwator tuteje kónčiny Frank Knobloch praji, zo je tute zarjadowanje widźomnosć serbskeho w Delnim Wujězdźe powyšiło.

Pod hesłom „Knihi su zastupny lisćik do raja fantazije“ je Rěčny centrum WITAJ sobotu 21. raz čitanske wubědźowanje w Smolerjec kniharni zarjadował. Najlěpši čitarjo 3. lětnika wšěch serbskich zakładnych šulow so wubědźowachu. Mjez maćernorěčnymi wudoby sej Elsbeth Volkmarjec ze Serbskeje zakładneje šule Pančicy-Kukow prěnje městno, w skupinje serbscy wuknjacych Sanne Rauerec ze Serbskeje zakładneje šule Worklecy. Kónčne wurisanje je so w kooperaciji z Ludowym nakładnistwom Domowina přewjedło.

W pólskim Opolu wobdźěla so tuchwilu třo zastupjerjo Pawka na jutrownym seminarje MENS, Młodźiny europskich narodnych skupinow. Pod hesłom „Widźomnosć je wažna“ reflektuja młodźi zastupjerjo wšelakich europskich narodnych mjeńšinow, kak so jich mjeńšina w zjawnosći zwobraznja a kotre fasety so zanjechaja, njewidźa a kak móhli to změnić. Po štyrjoch lětach rozžohnujetaj so Felicia Touvenot a Krystof Grofa z předsydstwa MENS. Z tym njeje po wjace hač jednym lětdźesatku stajneho serbskeho zastupnistwa w tutym gremiju žadyn z Pawkow wjace na čole młodźinskeho europskeho towarstwa.

Campingowanišćo při Brězowskim jězoru ma dalšej mobilnej domaj dóstać, kotrejž matej so jako prózdninskej bungalowaj přenajeć. Na zašłym posedźenju gmejnskeje rady wo tym informowachu, zo buchu za to spěchowanske srědki přizwolene. Nětko chcedźa nadawk spěšnje wupisać, zo móhli mobilnej domaj hišće lětsa stajić. Hač móža so hižo w aktualnej sezonje wužiwać, hišće jasne njeje. Šěsć tajkich mobilnych bungalowow při campingowanišću při Brězowskim jězoru hižo maja.