Powěsće: pjatk, 11.04.2025

W naćisku koaliciskeho zrěčenja Zwjazka wupraja so zamołwići tež wo mjeńšinach. Tak ma so mjez druhim zastojnstwo zwjazkoweho społnomócnjeneho za wusydlencow a narodne mjeńšiny zesylnić. Dale wuznawa so přichodne knježerstwo, kiž wobsteji z CDU/CSU a SPD, cyle powšitkownje k wosebitemu škitej a specifiskemu spěchowanju připóznatych mjeńšinow w Němskej: su to Danojo w Němskej, Frizojo, Sinti a Roma a Serbja. Mjeńšinowa rada kritizuje naćisk z argumentom "Dwě sadźe njejstej program". Wona wobžaruje, zo njejsu so konkretne naprawy zapisali, kiž bě rada zamołwitym sposrědkowała.

Chróšćanska gmejnska rada je na swojim posedźenju štwórtk jednohłósnje lětuši hospodarski plan wobzamknyła. Nowotwar gratownje wohnjoweje wobory Chrósćicy je wobstatk lětušeho plana. To je z komornicu dorěčane, zo by gmejna měła składnosć, zapodać próstwu wo spěchowanje. Tež, hdyž přizwolenje přińdźe, so hakle klětu twari. Dale je krajnoradny zarjad Budyšin přizjewił, zo ma so puć mjez Kozarcami a Chrósćicami w lětušich lěćnych prózdninach wobnowić.

W gmejnje Njebjelčicy chce so w lěću zawod předstajić, kiž twari wětrniki. Kaž zdźěli wjesnjanosta André Bulank na kromje zašłeho posedźenja tamnišeje gmejnskeje rady, chce zawod mjez Kaponicu, S94 a Miłočanskej skału dwaj wětrnikaj natwarić. Štyri mjeńše wětrniki maja so wottwarić. W lěćnych prózdninach chce zawod ze zamołwitymi prěnje rozmołwne koła organizować a za projekt wabić.

70 šulerjow ze Serbskeje zakładneje šule Chrósćicy nazwučuje runje musical, kiž chcedźa k 800. jubilejej wsy srjedź junija předstajić. Wot srjedy rejowachu, spěwachu a hrajachu wšitke štyri lětniki a zhotowichu zdobom w małych skupinach kulisy a grafiki. Za to su sej do młodownje w Njeswačidle dojěli, pjatk so nawróća. Tekst musicala "Pupk swětnišća" je napisała Milenka Rječcyna, Syman Hejduška je hudźbu k tomu zestajał. Reje nazwučuje rejowarka Serbskeho ludoweho ansambla Katharina Herrmannowa. Projekt spěchuje Załožba za serbski lud.

Gmejnska rada Ralbicy-Róžant je na swojim posedźenju štwórtk nastajenje noweho wobtwarjenskeho plana za płoninu při něhdyšim rězaku w Sernjanach jednohłósnje wobzamknyła. Tam chce firma, kotraž poole za płuwanje a kupanje twari, swoju wobtwarjensku płoninu mjez druhim za wustajenišćo powjetšić.