Powěsće: sobotu, 12.04.2025

W dwurěčnych gmejnach je zdźěla hižo móžno, swoje hałuzy a dalše drjewo na hromady za chodojtypalenje dowjezć. W Bukecach na přikład smědźa to hižo wot spočatka měsaca, tak Melanie Lochnerowa z gmejnskeho zarjada, a gmejnscy dźěłaćerjo hromady za chodojtypalenje prawidłownje kontroluja. W Radworju na to skedźbnja, zo móža so hałuzy wot přichodneje póndźele wotpołožić. A w Chrósćicach je to hišće pozdźišo. Tam smědźa wobydlerjo swoje wěcy za spalenje hakle póndźelu popłdnju po młodych jutrach (28.04.) na hromadu dowjezć. Přičina za tutu lětušu krótkodobnosć je wopomnjeće na kónc Druheje swětoweje wójny při bliskim pomniku.

Nowe Zwjazkowe předsydstwo Domowiny je so pjatk oficialnje skonstituowało a je z tym dźěłokmane. Bě to zazběh předstejaceje legislaturneje periody hač do 2029. Fokus ležeše na mjezsobnym zeznaću a strategiskim wusměrjenju. Nimo toho rozłožichu sobudźěłaćerki a sobudźěłaćerjo zarjada Domowiny skrótka swoje dźěłowe wobłuki. Dale zeznachu čłonki a čłonojo prawniske a organizatoriske zakłady třěšneho zwjazka: wustawki, jednanski porjad, dźěłowe plany a strukturu gremijow Domowiny.

Na swojim konstituowacym posedźenju sobotu we Łazu přepoda iniciatiwa Serbski Sejm prěni raz swójske čestne myto. W běhu swjedźenskeho programa přepodadźa so dźakne wopisma něhdyšim zastupjerjam a wopisma za pomjenowanje nowowuzwolenym čłonam. Popołdnjo zahaji so z ekumeniskim nyšporom we Łazowskej cyrkwi. - Na lětušich druhich wólbach je so 738 wolerjow wobdźěliło - tróšku mjenje hač zašły raz. Woni wuzwolichu 12 zastupjerjow z Delnjeje a 12 zastupjerjow z Hornjeje Łužicy do iniciatiwy za Serbski sejm.

Přichod motocrossoweje čary na Kaponicy w Jaworje je njewěsty. Kaž zdźěli nam pokładnik towarstwa MC Jawora, Lars Gottschling, dyrbi so wjace hač třećina čary w přichodźe wróćo twarić. W zašłych měsacach běchu tohodla hižo prěnje dźěle čary přetwarili. Přičina je, zo chce wobsedźer ležownosće, na kotrejž dźěl čary leži, swoje polo w přichodźe hinak wužiwać. Něhdźe 30 lět dołho běše je towarstwo wot njeho wotnajało, samo wotkupić su je chcyli. Kak daloko móža w přichodźe w Jaworje hišće motocrossowe wulkozarjadowanja přewjesć, je njewěste. Čłonojo boja so, zo je čara za to překrótka. Towarstwo MC Jawora ma tuchwilu 120 čłonow, něhdźe połojca z nich su dźěći a młodostni.

Na campingowanišću w Němskich Pazlicach sobotu za katastrofowy pad zwučuja. Zasadźene su tamniša wohnjowa wobora, wuchowanska słužba, Techniski pomocny skutk a policija. Při zwučowanju dźe wo to, zo něhdźe 240 pomocnikow wjace hač 60 wosobam pomha, kiž buchu přez so palace bungalowy, powalene štomy abo awta ćežko zranjene. Ze zwučowanjom ma so zhromadne dźěło mjez pomocnikami polěpšić.