Powěsće: štwórtk, 10.04.2025

Historiske serbske krótkofilmy pokazachu so srjedu wječor w Lingnerowym hrodźe w Drježdźanach. Dr. Tereza Jakobsowa wot Serbskeho instituta, kotraž je předstajenje fachowje přewodźała: „My smy widźeli etnografiski material z połstatych lět hač do 80-tych lět. My smy widźeli nałožki, my smy widźeli etnografiski material k rejam. Cyle konkretnje k ludowym rejam, ale tež inscenacijam, politiskim zarjadowanjam a festiwalam.“ Něhdźe 60 ludźi je zarjadowanje wopytało, kotrež bě dźěl programa 37. Filmoweho swjedźenja w Drježdźanach. Hižo popołdnju stej so tam tež načasnej serbskej krótkofilmaj pokazałoj.

Byrnjež to zakoń předpisał, nima w Radworskej gmejnje přeco hišće tójšto kilometrow komunalnych drohow žanu běłu kromu. Tuž je gmejnska rada srjedu firmje z wokoliny Oschatza nadawk přepodała. Wo njón je so dohromady pjeć firmow prócowało. Nimo toho zastupowacy wjesnjanosta Maik Wirrig zdźěli, zo změje Radworski hród 2. meje zběhanku, k čemuž budu tež wjesnjenjo přeprošeni. Radworski něhdyši hród so hižo wjacore lěta wot swojeho wobsedźerja dospołnje a po historiskim přikładźe wobnowja.

W Njebjelčicach so staršiske přinoški za pěstowarnju njezwyša. To samsne płaći za ležownostny dawk. To je tamniša gmejnska rada srjedu jednohłósnje wobzamknyła. Dale je so naćisk za lětuši hospodarski plan předstajił, kiž ma deficit něhdźe 300.000 eurow. Plan wuleži nětko w gmejnskim zarjedźe a ma so w meji wobzamknyć.

W Serbskim internaće gymnazija w Budyšinje su srjedu Serbske młodźinske towarstwo Pawk, Domowina a dalši partnerojo wo prawicarsko-ekstremnych temach a problemach z tutymi rozprawjeli. Pod hesłom “Stabilna serbska młodźina w internaće” su so wosebje z antiserbskimi a prawicarskimi wuprajenjemi rozestajili, kiž su šulerjo serbskich šulow nazhonili a loni w protokolu zestajili a wozjewili. 11 šulerjow je so wobdźěliło. W přichodnych měsacach wopytaja iniciatorojo serbske młodźinske kluby, hdźež so wosebje na zarjadowanja a skrućenje identity młodźiny koncentruja.