Powěsće: wutoru, 08.04.2025

Domowina zahaji wutoru we Wulkich Zdźarach rěčny program z mjenom DOMOJ. Je to dźewjeć měsacow trajacy intensiwny kurs serbšćiny, za kotryž ćehnje jědnaće wobdźělnikow do tak mjenowaneho rěčneho hnězda. Na štyrjoch dnjach w tydźenju wuknu wobdźělnicy tam pod nawodom rěčneje wučerki Jadwigi Brězanoweje serbsce. Wuknjacy su mjez 30 a 50 lětami a pochadźeja ze wšelakich kónčin Hornjeje Łužicy, ze serbskeje hole, z Budyskeho kraja abo kónčiny podłu Klóšterskeje wody.

Serbscy rjemjeslnicy su połnje zaběrani z dojutrownymi přihotami. Sedłar Handrij Kral z Kamjeneje ma tuchwilu najwjace dźěła z wuporjedźenjom křižerskich gratow, něhdźe 12 tuchwilu wobdźěłuje, kaž tež šabraki a sedle. Podobnje wupada pola Mareka Buka w Róžeńće. Wobaj sedłarjej nastajitaj so hižo na nawal w martrownym tydźenju. Tež šwalča Petra Kupcyna z Worklec je wućežena. Křižerskej sukni je došiła. A nětko koncentruje so na předań seklow a cylindrow. A Radijo Satkula přewjedźe tuchwilu jutrownu bursu za wšěch, kiž hišće za křižerskim ekwipmentom pytaja abo maja něšto w poskitku.

Program za lětuši Łužiski festiwal bu póndźelu w Berlinje předstajeny. Dohromady je w južnej Braniborskej a Hornjej Łužicy 30 předstajenjow w lěću planowane. Nimo reje, dźiwadła a koncertow chcedźa lětsa swójbnu operu wo Krabatowej powěsći zahrać. Intendant Daniel Kühnel praji, zo je drje Krabat jara woblubowany material za wuměłcow a zo so wjele wužiwa, ale zo změje předstajenje na Łužiskim festiwalu hinaši raz hač hižo znaty film abo dźiwadłowe hry.

Hišće w tutym měsacu zahaja so na jednym boku cyrkwinskeje žurle w Ochranowje hrube dźěła za nowe multifunkcionalne rumy. Za to buchu spočatk lěta wjerchi a sćěny zwottorhane, tak spěchowanske towarstwo Ochranowskeje cyrkwinskeje žurle. W přichodnym kroku nowe mjezywjerchi zaćahnu, dźěle pincy na składowanski rum přetwarja a liftowy šacht instaluja. Za lift je mjeztym tež něhdźe połojca darowanskeje sumy we wysokosći 25.000 eurow za swójski podźěl nahromadźena. Na druhej stronje cyrkwinskeje žurle pokročuja twarske dźěła za sanitarne připrawy a za nowu wosadnu kuchnju.

W Hornjej Łužicy je kriminalita wo nimale šěsć procentow stupała. To wuńdźe z kriminalneje statistiki za lěto 2024. Po ličbach policije zaleži powyšenje wosebje na ilegalnej migraciji, potajkim na tym, zo su ćěkancy scyła hranicu překročili abo zo nimaja dowolnosć tudy žiwi być. Awtow je so w Hornjej Łužicy loni něšto wjace pokradnyło hač do toho, mjenje je porno tomu so zadobywało. Ćežišća wostanu gmejny při pólskej a čěskej hranicy.