Powěsće: póndźelu, 07.04.2025

Sakska chce so za to zasadźić, zo so srědki za Załožbu za serbski lud zwyša. To praji nawodnica kulturneho wobłuka Sakskeho ministerstwa za wědomosć, kulturu a turizm Franciska Brechowa w postrownych słowach w mjenje ministerskeho prezidenta Michaela Kretschmera na hłownej zhromadźiznje Domowiny sobotu w Budyšinje. Tež Zwjazk je hižo signalizował, swoju přiražku wotpowědnje tomu moderatnje zwyšić za nowe financne zrěčenje Załožby za serbski lud wot lěta 2026. Zdobom připowědźi Brechowa, zo zarjaduje so při Sakskej statnej kencliji městno społnomócnjeneje za serbske naležnosće. Sakski kabinet ma to 15. apryla wobzamknyć.

Wosady serbskeho pastoralneho ruma w Drježdźansko-Mišnjanskim biskopstwje móža samostatne wostać. Dyrbjachu pak koncept za zhromadne zarjadnistwo namjetować - podobnje zarjadniskim zhromadźenstwam komunow. Tole rjekny biskop Heinrich Timmerevers sobotu wječor w Chrósćicach na kemšach, z kotrymiž swoju dwudnjowsku wizitaciju wosady zakónči. W běhu tuteje je zakładnu šulu, pěstowarnju a zawodaj wopytał, sej farsku chroniku wobhladał kaž tež z přistajenymi, wosadnej radu a wosadnym předstejićerstwom rozmołwy wjedł. Sobotu popołdnju bě wotewrjena duchowna rozmołwa ze zajimowanymi wosadnymi. Přichodna biskopska wizitacija wotměje so we Wotrowje.

W Serbskim muzeju je so wčera wustajeńca “Što rěka tu mjeńšina” wo Serbach, Frizach, Danach a Sintijach a Romach wotewrěła. Direktorka muzeja, Christina Boguszowa, postrowi 60 hosći, mjez nimi zastupjerjow němskich awtochtonych mjeńšinow. Pućowanska wustajeńca Mjeńšinoweho sekretariata a jeje eksponaty skića wosobinske perspektiwy a pohnuwaja k tomu, wo přisłušnosći a kulturnej identiće rozmyslować. Zwjazkowe ministerstwo za nutřkowne je wustajeńcu spěchowało. Dwaj měsacaj je tuta hišće w Budyšinje widźeć, po tym pućuje dale do Bremena.

Błótowski krimi "Smjerć po štučkach" z pjera Alexandra Maruscha a Madleńki Šołćic su sobotu posledni raz na hłownym jewišću Němsko-Serbskeho ludoweho dźiwadła w Budyšinje předstajili. Šěsć hornjoserbskich předstajenjow je sej dohromady 850 ludźi wobhladało. Hru, kotruž pokazachu prapremjernje tež hižo w nalěću w Delnjej Łužicy, je we woběmaj serbšćinomaj do ludoweje rěče Fabian Kaulfürst přełožił. Spisanje hry bu spěchowane wot Załožby za serbski lud.

W Ralbicach je sobotu wosadny farar Šćěpan Delan rumnosće na ponowjenym Frenclec-Konjechtec statoku požohnował. Frenclec mandźelskaj staj objekt w zašłym lěće tak přetwariłoj, zo mataj tam w přichodźe tři dowolowe bydlenja a bydleni na podruž. Wot dźensnišeje póndźele Melcherec fyzioterapija w delnich rumnosćach swoje posłužby poskićuje. Hač do kónca lěta ma tež wobchod hotowy być, w kotrymž předawaja so lokalne produkty.

Logistiski bataljon Zwjazkoweje wobory přińdźe drje hakle w 2030-tych lětach do Njedźichowa. Jedne wuměnjenje za to je mjenujcy, zo je infrastruktura na městnje hotowa, tak rěčnik logistiskeho komanda Zwjazkoweje wobory. Wotpowědne twarske naprawy pak budu po informacijach Zwjazkoweho zarjada wójska za infrastrukturu, wobswětoškit a posłužby hakle w přichodnym lětdźesatku hotowe. W Njedźichowje maja so kaserna, zwučowanišćo a třělnišćo natwarić. Tuchwilu so potrjeba wójska zwěsća a prěnje přepytowanja areala přewjedu.