Powěsće: pjatk, 28.03.2025

Załožba za Serbski lud dóstanje za twar Serbskeho foruma wědy na Lawskim arealu w Budyšinje wjace pjenjez. 50 milionow eurow steji nětko za zhromadny nowotwar Serbskeho muzeja a Serbskeho instituta k dispoziciji. To zdźěli Sakske ministerstwo za infrastrukturu a krajne wuwiće na naprašowanje. Ministerstwo stara so wo rozdźělenje pjenjez za projekty strukturneje změny. Spočatnje bě so za Serbski forum wědy 44,5 milionow eurow přizwoliło, tola w běhu planowanja su košty dale a bóle rozrostli. Po pruwowanju a přiměrjenju plana ze Sakskej natwarnej banku a Załožbu za serbski lud je ministerstwo wjace hač 10 procentowskemu stopnjowanju twarskeje sumy přihłosowało.

Pod hesłom "Wutrobnje witani?! 100.000 serbowacych a kak dale?" wotmě so štwórtk w Budyskim Serbskim domje lětuša prěnja serbska debata na kotrejž wobdźěli so na 50 zajimcow. Rjad zarjadowanjow wuhotuje Sakska centrala za politiske kubłanje zhromadnje ze Załožbu za serbski lud a Serbskimi nowinami štwórtk tež w kooperaciji ze Serbskim institutom. Diskutowaše so předewšěm wo tym, kak měło so z noworěčnikami wobchadźeć. Hosćo na podiju běchu Fabian Kaulfürst ze Serbskeho instituta a noworěčnicy Anna-Rosina Wjeselina, Cornelia von Ruthendorf-Przewoska a Nicole Dołowy-Rybińska. Přichodna debata jedna přichodny tydźeń w Radworju wo serbskim šulstwje.

W gmejnje Pančicy-Kukow wostanu dróhi w nocy najprjedy raz dale wobswětlene, to wobzamkny štwórtk gmejnska rada na swojim posedźenju. Kaž wjesnjanosta Markus Kreuz zdźěli, móhli z wotšaltowanjom LED-wobswětlenja w času wot 23.00 hodź. do 04.30 hodź. lětnje 3800 eurow zalutować. Tuchwilu pak so za tutu sumu hišće njewudani, dokelž su tež wudawki za rjadowanje podźělneho wotšaltowanja trěbne. Přećiwo redukowanju časa wobswětlenja wuprajichu so tež wjacori přitomni wobydlerjo, byrnjež njeměli so po jednanskim porjedźe słowa jimać.

Łužiska hala we Wojerecach móhła po přetwarje hosći z dwurěčnej fasadu a serbskimi motiwami witać. To praji regionalna rěčnica župy Handrij Zejler, Birgit Hančikowa, po minjenym posedźenju přirady za serbske naležnosće města Wojerecy. Tež jednaćel Łužiskeje hale we Wojerecach je so na posedźenju wobdźělił a je po słowach Hančikoweje zwólniwy, naprawu zwoprawdźić. Tež serbsku kofejownju abo rum za trajnu wustajeńcu wo Serbach chcedźa zarjadować. Saněrowanje hale pak so dliji, tak jednaćel Łužiskeje hale, Dirk Rolka. Twarske dźěła so do srjedź 2026 njezahaja.

Towarstwo přećelow Serbow (SPL) je z rjadom “Talkshow Serbowanje” na swojim youtubowym kanalu startowało. Předsyda, žurnalist Lukaš Novosad, rozmołwja so w Serbskim seminarje w Praze před kameru ze serbskimi hosćimi. Něhdźe hodźinske interviewy su kompletnje serbskorěčne z čěskimi podtitulemi. W prěnim interviewje, kotryž bu w nocy w interneće wozjewjeny, předstaji so něhdyši předsyda towarstwa SPL, architekt Hanuš Härtel z Prahi. Wón wo sebi praji, zo je Serb runje tak kaž Čech a běžnje serbsce rěči. Dalše rozmołwy noweho talkshow-formata maja so wotnětka dwuměsačnje wozjewić.

W Barće su wčera w tamnišim ponowjenym šulskim kompleksu zběhanku swjećili. Wokrjes Budyšin je wobstejace šulske twarjenje ponowił a je wo dwaj domaj rozšěrił. Dohromady płaći naprawa 19 milionow eurow. Twarske dźěła maja klětu spočatk lěta zakónčene być. W ponowjenej šuli budźe městno za 300 šulerjow. Před někotrymi dnjemi su twarske firmy započeli, tepjenje, přewětrjenje a sanitarne připrawy kaž tež elektriku zatwarić.