Powěsće: štwórtk, 27.03.2025

Syman Pawlik budźe nowy koordinator za serbske naležnosće w Budyskej wotnožce Krajneho zarjada za šule a kubłanje LaSuB. Kaž Pawlik wobkrući, nastupi wón zastojnstwo 1. apryla. Rodźeny Wěteńčan skutkowaše mjez druhim w projektnym a organizaciskim managemenće frakcije FDP w Zwjazkowym sejmje w Berlinje. K jeho nowym nadawkam w Budyšinje słuša mjez druhim fachowa podpěra direktora Budyskeje wotnožki LaSuB při strategiskich a operatiwnych nadawkach a přidźěło za zjawnostne dźěło zarjada.

Marko Šiman za CDU a Doreen Schwietzerowa za AfD staj sakskej zastupjerjej parlamentariskeje přirady Załožby za serbski lud. Zastupnica Šimana je Elaine Jenčec, Schwietzerowu zastupuje stronski kolega Timo Schreyer. Jich su srjedu w Drježdźanach w krajnym sejmje wolili. Parlamentariska přirada Załožby za serbsku lud je gremium, kiž podpěruje a poradźuje Załožbowu radu. Parlamentariskej přiradźe přisłušeja zastupjerjej Zwjazkoweho sejma a krajneju sejmow Sakskeje a Braniborskeje.

Dźeń po konstituowanju 21. zwjazkoweho sejma poda so Dawid Statnik srjedu na prěnje politiske rozmołwy do Berlina. Kaž Domowina zdźěli, bě zaměr, serbske temy a zajimy w aktualnych koaliciskich jednanjach zakótwić. Tak zetka so ze zapósłanču Kathrin Michel wot SPD, ze zapósłancom Florianom Oestom wot CDU a Stefanom Seidlerom wot SSW. Tón přilubi, so nimo zajimow Danow a Frizow znowa wo serbske temy a Sinti a Romow zasadźować.

W Lipsku su srjedu wječor knižne wiki zahajili. Ludowe nakładnistwo Domowina je lětsa znowa ze stejnišćom w hali 2 zastupjene. Tam předstaji LND mjez druhim njedźelu připołdnju nowej publikaciji Benedikta Dyrlicha “Serpowe dny” a “Dozynki”, kotrejž stej k wikam wušłej. Benedikt Dyrlich je tohorunja na dalšich němsko-słowjanskich čitanjach kaž tež na rozmołwach spisowaćelow z wuchoda a zapada słyšeć. Tak mjez druhim njedźelu we wobłuku projekta časopisow MATRIX a BAWÜLON w hali 4.

W Hornjej Łužicy so w přirunowanju z Braniborskej žně hromaka hišće trochu dlija. Na Horach a w Hózku, runje tak kaž w Koćinje, so na hromakowych polach hišće ničo njehiba. Z Domanic burskeho statoka w Hózku rěka, zo su nocy hišće přezymne, zo by hromak derje rostł. W Krabatowym mlokowym swěće w Koćinje změja lětsa napřećo MKH nowe polo, hdźež móža sej priwatnicy na 46 rynčkach sami swój hromak kałać, zdźěli nawoda Tobias Kockert. Hač na dwaj rynčkaj su za lětsa wšě přenajate. Warianta z přenajećom zbudźa mjez ratarjemi zajim, tak Kockert, dokelž je dźeń a mjenje žnjenskich pomocnikow. Za něhdźe dwaj tydźenjej abo hač do třoch tydźenjow chcedźa z kałanjom započeć. Loni su miłych temperaturow dla móhli hižo kónc měrca žně kejžorskeje zeleniny zahajić.

Za truck-stop w Zejicach je k prěnjemu aprylej nowy wobhospodar pytany. Kaž mějićel areala - Wjeselic ratarski zawod z Chrósćic - na naprašowanje zdźěli, je dotalny wobhospodar přemało personala dla zrěčenje wupowědźił. Nimale 5.000 kwadratnych metrow wulki areal ma so tež přichodnje jako parkowanišćo z imbisom dale wjesć. Doniž njeje přichod terena zrjadowany, wostanje cyły areal zawrjeny.

Na lětušim mjezynarodnym intensiwnym rěčnym kursu čěšćiny na uniwersiće w Praze a w Čěskich Budějovicach wobdźěli so pjeć Serbow. Kaž zdźěli sobudźěłaćerka Rěčneho centruma Witaj, Jadwiga Kaulfürstowa, su wšitke městna wobsadźene. Třo zajimcy steja na lisćinje narunanskich kandidatow. Woni pak maja dobre šansy, zo so tohorunja na rěčnym kursu čěšćiny wobdźělić smědźa, tak Kaulfürstowa dale. Mjezynarodny intensiwny rěčny kurs čěšćiny wotměje so w juliju a awgusće. Zo Serbja za njón přeco stipendije dóstanu, je poskitk čěskeho knježerstwa z lěta "Chróšćanskeho zběžka" 2001.

Lodowu sezonu w Běłej Wodźe su srjedu dočasnje zakónčić a lodowu arenu zawrěć dyrbjeli. Jako přičinu mjenuje měšćanski zarjad techniski defekt w lodowej mašinje. Na mustwo Łužiskich liškow nima to žane wuskutki, dokelž je lodohokejowa sezona zakónčena. Dorostowi hrajerjo liškow pak njemóža dale hrać. Tohorunja zakónčić dyrbjachu zjawne smykanje w arenje, trening sportowych towarstwow a šulskich rjadownjow. Nimo toho su planowane zarjadowanja w arenje wotprajene. Lodowu připrawu chcedźa tak spěšnje kaž móžno wuporjedźić, zo móža nowu lodowu sezonu nazymu po planje zahajić.