Powěsće: srjedu, 26.03.2025

Dohromady 59 šulerjow šěstych lětnikow ze Slepoho, Kulowa, Ralbic, Worklec, Radworja, Budyšina, Serbskeho gymnazija a 30 šulerjow z Brjazynje, Janšojc, Žylowa a Delnjoserbskeho gymnazija wobdźěli so wot srjedy na 57. Centralnej olympiadźe serbskeje rěče we Wodowych Hendrichecach. Poboku steji šulerjam a šulerkam 13 hornjoserbskich studentow a dwě delnjoserbskej studence kaž tež 13 wučerjow z Hornjeje a Delnjeje Łužicy. Hač do pjatka so šulerjo k wupytanym temam wubědźuja a móža tam swoje kmanosće w serbšćinje pokazać.

Krabatowy młyn w Čornym Chołmcu ma čerstwu třěchu. W zašłych dnjach su tam třěchu ze sćiny wuporjedźili a zdźěla ponowili. Po pjatnaće lětach bě to zaso jónu trěbne, praji jednaćel Krabatoweho młyna, Tobias Čižik. Wšo dohromady je to něhdźe 15.000 eurow płaćiło. Wo třěchu z rohodźe je so na to specializowany zawod z Błótow starał. Tajke třěchi su za region drje njewšědne, tola twar Krabatoweho młyna pochadźa prěnjotnje z Dubrjenka, hdźež něhdy třěchi ze sćinu kryjachu.

Serbske wědomostne towarstwo Maćica Serbska je wot wutory na instagramje zastupjene. Kaž informuje předsydka towarstwa dr. Anja Pohončowa w nowinskej zdźělence, chce Maćica zhromadnje ze Serbskej murju prawidłownje přinoški na instagramowym accounće Serbskeje murje wozjewić. Ze swojim projektom „Mudrišo z Maćicu“ chcetej so towarstwje předewšěm serbskim stawiznam, rěči a kulturje wěnować. W prěnim infoposće so wot wčerawšeho Maćica sama předstaja. Zaměr projekta je, wosebje młody publikum za serbske wědomostne temy zahorić a serbsku wědu šěrić.

Nowy planetarij we Wojerecach ma so na wědomostny centrum powjetšić. To je měšćanska rada wutoru rozsudźiła. Tak ma so kupla noweho planetarija w Nowoměšćanskim forumje Nikolai Ostrowski wot 8 na 12 metrow přerězka rozšěrić. Powjetšenje płaći 4,2 milionaj eurow přidatnje, wjace hač 90 procentow so z hornca za strukturnu změnu spěchuje. Město Wojerecy, astronomiske towarstwo a Němski centrum za astrofyziku chcedźa powjetšeny planetarij zhromadnje za sposrědkowanje wědy kołowokoło swětnišća wužiwać. Za cyłkownje 9 milionow eurow so tučasnje něhdyši młodźinski klub "OSSI" na Nowoměšćanski forum přetwari.

W Hornjej Łužicy je so loni wjace hač 13.400 wobchadnych njezbožow stało. Kaž zdźěli Zhorjelska policajska direkcija, je to něhdźe 400 mjenje hač lěto do toho. Zdobom bě loni tež mjenje ćežkich wobchadnych njezbožow a njezbožow ze smjertnym wukóncom. Dohromady je loni 29 wosobow wo žiwjenje přišło. Stupała pak je ličba ćežko- a lochko zranjenych wo štyri procenty respektiwnje nimale třinaće procentow. Najčasćišo je k njezbožam dóšło, dokelž njebuchu wobchadne prawidła wobkedźbowane a dokelž běchu šoferojo přespěšnje po puću.

W Biosferowym rezerwaće Hornjołužiska hola a haty su tuchwilu zaso amfibije po puću. Kaž nawoda rezerwata w Stróži, Torsten Roch, zdźěli, su žaby, mološe a kunkawy swoje pućowanje k njerkanskim wodźiznam nastupili. Pućowanski čas dwojožiwcow traje něhdźe měsac. Za škit zwěrjatkow su podłu dróhow škitne płoty natwarili. Za jich hladanje pak pytaja w Stróži dobrowólnych pomocnikow, kiž tři do štyri tydźenje wšědnje rano a popołdnju płoty kontroluja a tam připrawjene bowy  přez puć donjesu a wuprózdnja.