Powěsće: wutoru, 25.03.2025

W Hózku su póndźelu probowe točenje za twar podzemskeho labora Němskeho centruma za astrofyziku (DZA) zahajili. Kaž zdźěli rěčnik DZA, toča hač do 250 metrow hłuboko do zemje. Zwěsćić chcedźa z tym, kak wulki zornowcy blok je. Prawdźepodobnje wupřestrěwa so tón hač do Wojerec. Za čas NDR je tam hižo Wismut točiła. Tehdyše proby pak ničo wo kajkosćach zemje wokoło Kulowa njewuprajeja. Točenje ma nowe dopóznaća přinjesć. Lětsa je w regionje dohromady sydom točenjow předwidźane. Jedne w Konjecach su hižo zakónčili. Zo bychu optimalne stejnišćo za labor zwěsćili, je nimo testow w podzemju dale tež měrjenje na powjerchu planowane.

Koparski turněr europskich narodnych mjeńšin – Europeada – ma nowe směrnicy dóstać. To je skupina ekspertow njedawno na online-zetkanju wobzamknyła. Kaž zdźěli Federalistiska unija europskich narodnych mjeńšin FUEN, kotraž Europeadu zarjaduje, chcedźa turněr aktualnym narokam přiměrić. Dale měli přichodni wuhotowarjo wobdźělenym wjace móžnosćow dać, so zetkać a městna hrow muskich a žónskich mustwow njeměli tak daloko wot so zdalene być. To podpěruje tež nawoda serbskeje delegacije Clemens Škoda. Za dobru nmysličku ma wón tež, zo měła kóžda mjeńšina někotrych sudnikow sobu přinjesć. Přichodna Europeada wotměje so 2028 w sewjerowuchodźe Italskeje při mjezy k Słowjenskej.

EP-Energy z Čěskeje je wotněka jenički wobsedźer łužiskeho energijoweho koncerna LEAG. Kaž łužiske předewzaće póndźelu zdźěli, je inwestor poslednje 30 procentow podźělow na koncernje dźowce EP-skupiny ze sydłom w Praze předał. Kaž w zdźělence dale rěka, chce čěski koncern zhromadnje z managementom łužiskeho předewzaća proces energijoweje změny dale wjesć a so ze tradicionelnymi a fosilnymi paliwami rozžohnować. Inwestować chcedźa město toho do milinarnjow, kotrež so za baterije a za předźěłanje wodźika hodźa. Přestrukturowanje chcedźa socialnje znjesliwje a w dorěčenju ze Zwjazkom a komunami zwoprawdźić.

Gmejna Halštrowska hola inwestuje dale do infrastruktury při Lejnjanskim jězorje. Tak je tamniša gmejnska rada na swojim minjenym posedźenju tři nadawki za tak mjenowanu serwisowu přestrjeń rozdźěliła. Za něšto wjace hač 1,6 milionow eurow da komuna tam mjez druhim dróhu wutwarić, wobswětlenje instalować a wodowód skłasć. Wjetšina inwesticije so ze statneje strony spěchuje. Zdobom maja wokoło noweje nawsy prózdninske domčki, wobchody a hosćency nastać.

Wolejbulowe mustwo Sportoweje jednotki Chrósćicy je wčera wječor w Ralbicach druhi z dohromady sydom wólnočasnych wolejbulowych turněrow dobyło. Zarjadowar a wuhotowar turněra pod hesłom “Witamy nalěćo" bě Mustwo 1296. Druhe městno wobsadźichu Radworčenjo, kiž w finalu ze 13:15 Chróšćanam snadnje podležachu. Bronzowe třeće městno wudoby sebi mustwo Sokoła Ralbicy. Wobdźěliło bě so póndźelu w Ralbicach wosom cyłkow. Přichodny turněr přewjedźe so spočatk meje hišće raz w Ralbicach, potom budźe zarjadowar tamniši Sokoł.