Powěsće: pjatk, 21.02.2025

Na póstniskich dnjach budźe lětsa w hornjołužiskich karnewalowych metropolach wjac policistow zasadźene hač minjene lěta. Kaž zdźěli Bjarnat Domaška z porjadoweho zarjada města Kulow chcedźa zdobom na póstniskimaj ćahomaj sobotu a na róžowej póndźeli wěstotu skrućić a někotre křižowanišća z awtami zašlahać. Kaž zdźěli Zhorjelska policajska direkcija, steja póstniske zarjadowanja, předewšěm w Kulowje, Šěrachowje, Kinsporku a w Mužakowje sylnje w fokusu policije. Zastojnicy sej prawidłownje z komunami dorěča, kotre wěstotne naprawy su trěbne. Swjedźenski ćah na róžowej póndźeli je za hornjołužiske karnewalowe towarstwa wjeršk póstnic. Loni bě po informacijach policije róžowu póndźelu w Kulowje něhdźe 14.000 ludźi po puću.

Hornju Łužicu je loni zaso telko dowolnikow wopytało kaž za čas do korony. To wuchadźa z wozjewjenja Krajneho statistiskeho zarjada w Kamjencu Tak je ličba přenocowanjow w Hornjej Łužicy a Delnjej Šleskej porno lońšemu wo 1,5 procentow a porno do koronowemu lětu 2019 wo 0,3 procenty na něšto wjac hač dwaj milionaj stupała. Kaž ze statistiki z Kamjenca dale wuchadźa bě najwjac hosći z Pólskeje.  

Rěznistwo Meister w Budyšinje je insolwencu přizjewiło. Kaž zdźěli nachwilny zarjadnik insolwency pak firma najprjedy raz dale mjasowe a kołbasowe wudźěłki produkuje a předawa. Do financnych wuskosćow je rěznik mjez druhim stupacych energijowych a personalnych kóštow přišoł. Minjeny tydźeń njemóžachu techniskeho defekta dla produkować, tohodla su nětko insolwencu přizjewili, tak zarjadnik insolwency dale. W rěznistwje Meister maja tuchwilu 56 přistajenych.

Saněrowar bywšich wuhlowych jamow LMBV móže planowanje zhusćenskeje sćěny za zběrnik wody Łaz II wupisać. To je za brunicowe saněrowanje zamołwity wuběrk wobzamknył. Sćěnu twarić započeć pak budu po informacijach LMBV hakle spočatk 2030tych lět. Wjacore kilometry dołha a hač do 100 metrow hłuboka škitna sćěna ma tomu zadźěwać, zo dóstanje so železo z dnowneje wody, do Sprjewje a Małeje Sprjewje. Mamutowy projekt płaći po prěnim trochowanju něhdźe 100 milionow eurow.

Wjelki w Hornjej Łužicy dźěłaja wotnětka za wědomosć. Kaž zdźěli Krajny zarjad za wobswět, ratarstwo a geologiju su wědomostnicy za to štyri wjelki z črjódow pola Wuskidźe (němsce: Weißkeisel) a Dubca (němsce: Daubitz) ze sćelakami wuhotowali. Tak zezběrane daty dawaja informacije wo dynamice we wjelčich stadłach w Hornjej Łužicy. Wot lěta 2019 su w Sakskej dohromady 17 wjelkow ze sćelakami wuhotowali. Tuchwilu je w Sakskej 43 wjelčich teritorijow z dohromady 37 stadłami a šěsć porikami dopokazanych.

Dźensa zahaja so w Lubnjowje tarifowe jednanja za 7.200 přistajenych energijoweho koncerna LEAG a porjedźerskeje firmy za železniske jězdźidła “MCR Engineering Łužica”. Energijowe dźěłarnistwo IGBCE žada sej zwyšenje mzdow wo dźewjeć procentow. Za přičinu mjenuje wone inflaciju minjenych lět. Posledni raz su w LEAG tarifowe mzdy 2023 wo sydom procentow zwyšili.