Powěsće: štwórtk, 20.02.2025

Załožba za serbski lud dyrbi lětsa swoje rezerwy wužiwać, zo by wurunany hospodarski plan měła. Za přičinu mjenuje zarjad Załožby we srjedu wozjewjenej zdźělence stopnjowanje mzdow w zjawnej słužbje a porno lońšemu njezměnjene přiražki Zwjazka a krajow Sakska a Braniborska. Dale a bóle napjate je financowanje serbskich institucijow a projektow tohorunja, dokelž płaći za Załožbu pobrachowaceho wobzamknjeneho etata wšitkich třoch pjenjezydawarjow dla nachwilne hospodarjenje. Kaž praji direktor Załožby Jan Budar pytaja za pućemi wažne projekty a dźěławosć institucijow zaručić. Tuchwilu hotuja so na jednanja wo nowe financowanske zrěčenje. Załožba zasadźuje so za zwyšenje přiražkow a nadźija so, zo so jednanja w nazymje wuspěšnje zakónča.

Zymska słužba w Budyskim wokrjesu je zaručena a to najebać wupady wjacorych sobudźěłaćerjow chorosće dla. Kaž z krajnoradneho zarjada rěka, dyrbjachu minjene dny někotre awta zymskeje słužby pobrachowaceho personala dla stejo wostajić. Za to pak je wokrjes nadawki za zymsku słužbu priwatnym předewzaćam přepodał. Tuchwilu wukonja 15 wokrjesnych a tři jězdźidła cuzych předewzaćelow zymsku słužbu na dróhach we wokrjesu w dwěmaj změnomaj.

Serbske nakładnistwo Veles ma nowej serbskej słuchoknize w poskitku. Kaž wone na swojich internetnych stronach pisa, stej to “Mali přećeljo” a „Lute překwapjenki” z rjadu Dolina při rěce, kotrejž předležitej w formaće mp3. Stawizny wo spřećelenych zwěrjatach myškomaj Měrce a Kiki, šwincu Dorianje, zajacu Ferdiju a sowje Luna, čita dźiwadźelnica Gabriela Marija Šmajdźina. Syman Handrik je za słuchoknize hudźbu stworił.

W Stróži pola Rakec ma nastać nowa wohnjowoborna gratownja. Kaž gmejna Rakecy zdźěli, přichodne dny z prěnimi dźěłami započnu. Srjedu je gmejnska rada nadawk za zwottorhanje stareje tepjernje we wsy firmje z Hućiny za nimale 20.000 eurow přepodała. Dalše nadawki chcedźa w měrcu přepodać. Nowotwar, kiž płaći něhdźe 1,7 milionow eurow, je najwjetše předewzaće Rakečanskeje gmejny přichodneju lět. Nowa gratownja w Stróži je trěbna, dokelž je dotalna gratownja chětro stara a dodźeržana. Schwaliła je gmejnska rada zdobom hospodarski plan za lěće 2025 a 2026.