Powěsće: srjedu, 19.02.2025

Za lětušu Krabatowu sagu w Čornym Chołmcu móža sej zajimcy zaso kartki přez telefon a e-mailku w Krabatowym młynje kupić. To zdźěli na naprašowanje projektowy nawoda Anton Fuchs. Jedna třećina kartkow dotal njeje hišće předata. Fuchs pak skedźbni na to, zo su tuchwilu prózdnin dla mjenje sobudźěłaćerjow při telefonje. Krabatowy team dźěła dale na tym, kartki tež zaso w syći předawać. Hdy to budźe, njeje hišće dokładnje jasne, tak Fuchs. Onlinowy předawanski system je so zašły tydźeń k startej předpředanje hoberskeho nawala dla sypnył.

Přichod słowjanskeho hrodźišća w Radušu njeje hišće doskónčnje jasny. Wo tym rozprawja delnjoserbska redakcija RBB. Kaž zdźěli wutoru měšćanosta Wětošowa Bengt Kanzler, smě tuchwilny wobhospodar hrodźišća David Chmelík ze swojej załožbu Slavonic Europe najprjedy raz dale skutkować. Měšćanska rada je na wurjadnym posedźenju póndźelu rozsudźiła, zo wostanje hrodźišćo w rukamaj Chmelíka. Wobě stronje pak matej wo dołhodobnym rozrisanju dale jednać. Město Wětošow a wotnajer hrodźišća stej so mjeztym hižo přibližiłoj.

Wot lětušeho apryla ma jězor pola Ranja (němsce: Großräschen) zaso wužiwajomny być. Kaž zdźěli saněrowar něhdyšich brunicowych jamow LMBV, smědźa na jězorje potom zaso čołmy jězdźić a tež kupanje ma w nim zaso dowolene być. Dale maja hač do 2026 zwiski mjez Sedličanskim, Parcowskim a Lejnjanskim jězorom dotwarjene być, tak zo móža po wšitkich jězorach Łužiskeje jězoriny z cyłkownej płoninu něhdźe 4.000 hektarami łódźe jězdźić.

Na Serbskej zakładnej šuli w Radworju chcedźa šulski chór zarjadować. Kaž zdźěli nawodnica šule, Angela Rynčowa, pytaja za njón nawodnicu abo nawodu. Spěwny cyłk měł šulske zarjadowanja wobrubić a serbsku rěč a kulturu hajić, rěka w zdźělence. Chór měł zdobom swjatočnosće składnostnje 100lětneho wobstaća kubłanišća we wsy wobrubić, kotrež tam klětu swjeća.

Drježdźansko-Mišnjanske biskopstwo přijimuje wot nětka přizjewjenja za jězbu młodźiny do Roma. Kaž biskopstwo zdźěli, přewjedu "Tydźeń młodźiny" w rjedźe swjateho lěta w Romje. Wón ma so wot 29. julija do 4. awgusta wotměć a charakter swětoweho zetkanja młodźiny měć. Tež Drježdźansko-Mišnjanski biskop Heinrich Timmerevers so na jězbje wobdźěli. Přizjewjenja su hač do kónca apryla mjez druhim na młodźinskej internetnej stronje biskopstwa móžne.