Powěsće: sobotu, 15.02.2025

Wšitke kulturne projekty a institucije dóstanu lětsa wot Kulturneho ruma Hornja Łužica-Delnja Šleska mjenje pjenjez. To je Kulturny konwent pjatk rozsudźił. Mjez požadarjemi wo spěchowanje je tež Folklorny festiwal "Łužica", kiž dóstanje lětsa 45.000 eurow město 65.000 eurow. Podobna je situacija institucijow, kaž praji čłon konwenta Jan Budar. Kóšty su dale stupali, budget Kulturneho ruma nic, tohodla su so runje w sparće dźiwadło na to dojednało, zo płaća so přiražki wot 2024. To je drje samsna ličba, ale dokelž su kóšty stupali, je to de facto skrótšenje za dźiwadło w Zhorjelcu, za Budyske dźiwadło a za ansambl, tak direktor Załožby za serbski lud dale. Tak dyrbjachu tež za institucionelne spěchowanje z nimale dwěmaj milionomaj mjenje wuńć. Cyłkowny budget Kulturneho ruma Hornja Łužica-Delnja Šleska wučini něhdźe 18 milionow eurow.

Něhdźe 30 pomocnikow je pjatk we Worklecach pomhało šulu za saněrowanske dźěła spřihotować. Tam su roły a tepjenja wutorhali a rjadownje rumowali. Tež wjesnjanosta Clemens Poldrack zapřimny a je hordy na podpěru staršich, młodźiny, wohnjoweje wobory a Bobkec kaž tež Šołćic zawoda. Dalši přiwjezechu hišće graty a mašiny. Sobotu maja wšitke dźěła zakónčene być. Kónc měrca ma so přetwar a ponowjenje na wyšej šuli "Michał Hórnik" zahajić.

W Klětnom pojědźe wot apryla zaso mały bus bjez šofera, kiž pojědźe wot samoh we wsy mjez dwórnišćom a přistawom při Bjerwałdskim jězoru tam a sem. Hamorska gmejnska rada je tomu přihłosowała, zo z projektom pokročuja. Zajimcy móža 18 km/h spěšne jězdźidło darmo wužiwać. Bus bjez šofera je dźěl slědźenskeho projekta Drježdźanskeje techniskeje uniwersity, zhromadnje z wobchadnym zaměrowym zwjazkom Hornja Łužica-Delnja Šleska. Poprawom skónči so projekt lětsa, ma pak so najskerje wo lěto podlěšić. Cil je, telko datow kaž móžno za awtomatizowane jězdźěnje hromadźić.

W Kulowje tamniše póstniske towarstwo sobotu ze swojim druhim kapičkowym wječorom pokročuje. Za to wječor w Kulowskej wjacezaměrowej hali nowy princowski por zawjedu. Princ je rodźeny Němčan Lukas Krusche ze swojej žonu a princesnu Isabel, maršal je Andreas Korch z Němcow. Wón wukonja tute zastojnstwo hižo druhi raz. Po druhim kapičkowym wječoru sćěhuje přichodny kónc tydźenja maskowy bal. Wjeršk budźe potom póstniski kónc tydźenja ze žónskimi póstnicami a Róžowej póndźelu. Je to mjeztym 319. póstniska sezona w Kulowje.

Wubědźowanje wo najrjeńše jutrowne jejka so lětsa k 72. razej přewjedźe, znowa w kategorijomaj za dźěći/młodźinu a za dorosćenych. Spěchowanski kruh za serbsku ludowu kulturu z.t. namołwja ludowych wuměłcow wšelakeje staroby k zapodaću swojich kolekcijow. W kategoriji "dorosćeni" je kónc zapodaća hižo 5. měrc a za "dźěći/młodźina" 28. apryl. Bliše informacije, kak a hdźe móžeće swoje kolekcije zapodać, namakaće na internetnej stronje towarstwa.

Za jubilejny 40. Sokołski wolejbulowy turněr wo pokal Domowiny, sobotu 29. měrca w Radworju, je so pola Serbskeho Sokoła, třěšneho zwjazka serbskich sportowčow a sportowcow, jenož sydom mustwow přizjewiło. To je tydźeń do kónca přizjewjenskeho časa negatiwny rekord. Sobu hrać njebudźe lětsa na přikład wučerske mustwo Serbskeho gymnazija Budyšin dla pobrachowacych hrajerkow a hrajerjow. Tež cyłkaj Sportoweje jednotki Chrósćicy a Sportoweho towarstwa Radwor, kiž ličeštej dotal stajnje ke krutym zastupnistwam, njestejitej na přizjewjenskej lisćinje.