Powěsće: póndźelu, 17.02.2025

Sezona lětušich ptačokwasnych programow Serbskeho ludoweho ansambla z chórom, baletom, orchestrom a dźiwadźelnikomaj Boženu Bjaršec a Markom Bulankom-Pašku je so njedźelu z poslednim předstajenjom w Slepom skónčiła. Na cyłkownje dźesać předstajenjach w Hornjej a Delnjej Łužicy witachu dohromady 1.500 wopytowarjow. Wosom předstajenjow bě wupředate. Kruch pod titulom "Lubosć na žołmach" bě z pjera Jěwy-Marje Čornakec.

Lětuša hłowna serbska inscenacija Němsko-Serbskeho ludoweho dźiwadła Budyšin, "Smjerć po štučkach", je sobotu swoju hornjoserbsku premjeru w Budyšinje měła. Hižo loni bě dźiwadło Błótowski krimij w Delnjej Łužicy předstajiło. Za nětčišu Budysku premjeru pak bu hra zdźěla předźěłana. Dalše předstajenja zhromadneje hry režisera Aleksandra Maruša a něhdyšeje dramaturgowki Madleńki Šołćic su w měrcu a aprylu.

Ralbičanski cyrkwinski chór Lilija je kónc tydźenja w zwučowanskim lěhwje w čěskich Hejnicach był. Pod nawodom swojeje dirigentki Bernadet Šołćineje su sej spěwarki a spěwarjo zakłady wjacorych nowych pěsnjow přiswojili. Znowa nazwučowali su w intensiwnych probach tež pasion w přihotach na dojutrowny čas. Njedźelu dopołdnja je spěwny cyłk w tamnišej putniskej cyrkwi kemše wobrubił.

Dowolnicy w Hornjej Łužicy jězdźa rady z ćahom. To je digitalne naprašowanje zaměroweho zwjazka ZVON a marketingoweho towarstwa Hornja Łužica-Delnja Šleska (MGO) wudało. Wjace hač 800 ludźi ze Sakskeje, Berlina a Braniborskeje je so na naprašowanju wobdźěliło. Ze 36 procentami je ćah najlubše jězdźidło w dowolu, snadnje před awtom a busom. Na zakładźe tutych wuslědkow maja so turistiske poskitki w přirodnym parku Žitawske horiny, pozdźišo tež w Budyšinje a Zhorjelcu, lěpje na zjawny wobchad přiměrić.

Prěnje blidotenisowe mustwo muži Sportoweho towarstwa Viktorije Worklecy je znowa wokrjesny pokalny dobyćer. Trójka Roman Straube, Stefan Mith a Michał Mikławšk přesadźi so sobotu we Worklečanskej ćěłozwučowarni přećiwo cyłkam z Budyšina, Kamjenca a Čerwjenych Noslic. Zakitowar pokala je z tym znowa za wobwodne pokalne finale kwalifikowany. Tute budźe srjedź měrca we Worklecach.