Powěsće: pjatk, 14.02.2025

Team ZARI je štwórtk w Budyskim Kamjentnym domje swój aktualny akciski plan za hornjoserbšćinu předstajił. K tomu je syć za serbsku rěč a regionalnu identitu dohromady sydom potrjebow za rewitalizaciju serbskeje rěče wudźěłała. Mjez druhim ma so akceptanca widźomneje a słyšomneje serbšćiny w zjawnosći zwyšić a wobydlerstwo měło so ze swojim serbskim herbstwom zwjazać. Team ZARI planuje dohromady pjeć wšelakich dźěłarničkow w regionje, w kotrychž so akciski plan za hornjoserbšćinu předstaji.

Cyril Hančik wostanje na dalše tři lěta předsyda Towarstwa Cyrila a Metoda (TCM). Jeho naměstnik je nadal farar Gabriš Nawka. To je wuslědk hłowneje zhromadźizny štwórtk wječor w Chrósćicach. Nowy čłon w předsydstwje TCM je Roman Dźisławk z Chasowa. Dotalni čłonojo buchu wobkrućeni. Korporacije, sekcije a skupiny podachu swoje rozprawy. Za medije a redakciju Katolskeho Posoła wozjewi jeho šefredaktor farar Michał Anders, zo wopyta loni měsačnje 10.000 wosobow internetowu stronu časopisa katolskich Serbow. Za jednotliwe internetne strony zličichu loni nimale wosom milionow klikow.

W Trjebinje je něhdźe 30 zajimcow mjez druhim wo přichodźe serbšćiny w regionje diskutowało. Srjedu bě tam wobydlerska dźěłarnička k nadźěłanju dołhodobneho koncepta za žiwjenje po dobje hórnistwa. Serbska kultura a žiwa dwurěčnosć stej wažna inwesticija do přichoda, na přikład měła so rěč jako cuza rěč připóznawać. To by nawuknjenje serbšćiny po zakładnej šuli na gymnaziju wo tójšto wolóžiło. To praji sobudźěłaćerka inženjerskeho běrowa Barbara Werlingowa, kiž so z wuwićowym konceptom zaběra. Za zdźěłanje koncepta dóstanu gmejny Slepo, Dźěwin a Trjebin 40.000 eurow ze zwjazkoweho programa za wuwiwanje wjesnych kónčinow a regionalne tworjenje hódnotow.

Gmejnska rada Ralbicy-Róžant je so na swojim posedźenju štwórtk mjez druhim z Němskim centrumom za astrofyziku (DZA) zaběrała. Přičina bě nastawk w Sakskich Nowinach, w kotrymž so wo probowych točenjach w Hózku rozprawja. Wjesnjanosta Hubertus Ryćer, kaž tež radźićel Eduard Luhmann potwjerdzištaj, zo po wuprajenju profesora Christiana Stegmanna Konjecy faworit za stejnišćo DZA wostanu. Točenja wokoło Hózka słuža potwjerdźenju prawosće cyłkowneho stejnišća.

Budyska měšćanska rada je na swojim zašłym posedźenju srjedu dalšich čłonow za serbsku přiradu wuzwoliła. Su to Daniel Měrćink za CDU, Maik Baier za AfD, za frakciju Socialny naslědny Budyšin Andreja Kubankowa a za frakciju Swobodnych wolerjow wuzwolichu Dennyja Krauseho. Kaž zdźěli nowinski rěčnik města, Andre Wucht, so přirada potom 11. měrca skonstituuje, zdobom ma so potom tež rěčnik postajić.