Powěsće: štwórtk, 13.02.2025

Mjeńšinowy sekretariat namołwja ludźi, za dwaj tydźenjej wolić hić a so z tym za demokratisku Němsku zasadźować. Kaž pisaja zamołwići w nowinskej zdźělence, registruje sekretariat z wulkej starosću, zo politiske ideologije přiběraja, hladajo na diskriminaciju a wumjezowanje ludźi kultury, pochada abo rěče dla. Mjeńšinowy sekretariat tajke pozicije raznje wotpokazuje. Prawa mjenšinow njejsu samozrozumliwe, ale wuslědk lětdźesatki trajacych demokratiskich jednanjow, kiž měli so wobchować. Mjeńšinowy sekretariat w Berlinje zastupuje wšitke štyri awtochtone mjeńšiny w Němskej.

Gmejna Radwor je srjedu na posedźenju gmejnskeje rady swój lětuši hospodarski plan we wysokosći 6,8 milionow eurow wobzamknyła. Gmejna inwestuje wjace hač 1,3 miliony eurow. Tak dóstanjetej Minakałska a Radworska wohnjowa wobora nowe awto a puć wot Radworskeje nawsy k sportnišću dóstanje nowe wobswětlenje. Dla tutych inwesticijow ma hospodarski plan minus wot 740.000 eurow. Za klětu njebudu drje žane dalše inwesticije móžne, wobžaruje wjesnjanostka Madeleine Renčowa. 

Sakski krajny zwjazk NABU a tři dalše přirodoškitne zwjazki su w zhromadnym wozjewjenju planowany natwar wulkeho solarneho parka pola Slepoho kritizowali. Wosebje zo ma so tam prěni króć w Sakskej za wutwar fotowoltaiki lěs zničić, mjenuja zwjazki "fatalny signal". Zo maja so za to druhdźe nowe pasma lěsa stworić, po měnjenju NABU žane dosahace narunanje njeje. Za solarny park při železnicy pola Slepoho ma so 28 hektarow lěsa trjebić. Proces dowolnosće hišće zakónčeny njeje. Zhorjelski krajnoradny zarjad je sej wot inwestora hižo žadał, zo hladajo na klimu a zdźerženje lěsa swoje plany předźěła.

Zastaranje z mobilnej syću w Budyskim wokrjesu pokročuje. Kaž zdźěli Telekom, je zawod w zašłymaj měsacomaj dalšu městnosć wotkrył a tři dalše su so ze spěšnym internetom LTE wuhotowali. W Radebergu, Wachawje a Załomju nad Sprjewju je so z wutwarom tež syć w twarjenjach polěpšiła. Telekom wobhospodaruje w Budyskim wokrjesu tuchwilu 131 městnosćow, hač do 2027 ma 22 dalšich sćěhować. Wutwar mobilneje syće je wažny, dokelž potrjeba za spěšny internet wo 30 procentow wob lěto přiběra.

Na filmowym festiwalu "Berlinale", kiž so štwórtk w stolicy zahaji, je tež město Zhorjelc widźeć. Film "Mit der Faust in die Welt schlagen" po knize hornjołužiskeho awtora Lukasa Rietzschela změje tam swětowu premjeru. Wjerćeli su film na štyrjoch městnosćach w Zhorjelcu a zwonka njeho. Stawizna jedna wo radikalizowanju bratrow, kotrajž w małej wsy we wuchodźe Němskeje wotrosćetaj. Wot srjedź apryla so film tež w kinach pokaza.