Powěsće: srjedu, 12.02.2025

We Wojerecach je wuchowanska centrala za wuchodnu Saksku wutoru swoje 10-lětne wobstaće swjećiła. W běhu cyłosakskeje strukturneje reformy buchu před dźesać lětami tehdyše centrale Wojerecy, Budyšin, Běła Woda, Lubij a Zhorjelc hromadu zwjedźene. Dohromady 80 přistajenych koordinuje w integrowanej wuchowanskej centrali Wojerecy wšědnje něhdźe 500 zasadźenjow.

W přesydlenej wsy Nowy Miłoraz pola Slepoho twarja tuchwilu nowu kupjel. Wo tym informowaše nětko twarski zarjad zarjadniskeho zhromadźenstwa Slepo. Je to narunanje něhdyšeje kupjele we wottorhanym Miłorazu. Ke kupjeli słuša multifunkcionalne twarjenje, kotrež z drjewa natwarja. Hač do kónca meje ma płuwanska kupjel Nowy Miłoraz dotwarjena być.

Do posedźenja Njeswačanskeje gmejnskeje rady wotmě so wutoru wobydlerska zhromadźizna, w kotrejž chcychu so gmejnscy radźićeljo z wobydlerjemi dojednać na dalše postupowanje hladajo na tamniši park a hród. Gmejna njemóže hižo wudawki za hród a park zwjesć. Tohodla je tež hižo wo tym rozmyslowała, objekt do statnych rukow dać. To pak wjetšina wobydlerjow a towarstwa gmejny nochcedźa, dokelž stej hród a park njeparujomnej wobstatkaj wjeski a gmejny. Tamniše Towarstwo přećelow kultury a domizny chce hromadźe z gmejnu załožić iniciatiwu, kotraž nastaji koncept, kak hodźi so objekt w rukach gmejny zachować.

W gmejnje Łaz smě firma Sabowind z Freiberga pjeć wětrnikow natwarić. To zdźěli wjesnjanosta Thomas Leberecht wutoru na posedźenju tamnišeje gmejnskeje rady. Prawniski dohlad Budyskeho wokrjesa je rozsudźił, zo bě zakładne wobzamknjenje gmejny w lěće 2023 prawnisce w porjadku a zwjazowace. Loni chcyše gmejnska rada wobzamknjenje zaso cofnyć, dokelž je kritika na projekće přiběrała. Wětrnikowy park ma mjez Běłym Chołmcom a Hórnikecami nastać.

W Němsko-Serbskim ludowym dźiwadle su so kónčne proby za sobotnišu hornjoserbsku prapremjeru na hłownym jewišću zahajili. Błótowski krimi "Smjerć po štučkach" z pjera Alexandra Maruscha a Madleńki Šołćic je Fabian Kaulfürst do hornjoserbšćiny přełožił. Žanr błótowskeho krimija, kiž bě dotal jenož z telewizije znaty, dožiwi publikum z tym prěni raz w profesionelnym dźiwadle. Nastaće hry bu spěchowane wot Załožby za serbski lud.