Powěsće: wutoru, 12.02.2025

W Budyskim wokrjesu je so po dlěšej přestawce nowy pad afriskeje swinjaceje mrětwy jewił. W Komorowje pola Rakec zatřělene dźiwje swinjo bu pozitiwnje testowane, zdźěli krajnoradny zarjad. Tuchwilu pyta so mjez druhim z trutami a psami za dalšimi mortwymi dźiwimi swinjemi. Wot wuslědka wotwisuja dalše postupowanja a škitne naprawy. Poslednje na swinjacu mrětwu schorjene dźiwje swinjo bu w Budyskim wokrjesu loni w awgusće namakane.

W Budyšinje su póndźelu pjeć dalšim zarjadnišćam plaketu "Sorbisch? Na klar!" spožčili. Z akciju chce měšćanski zarjad serbsku rěč w měsće lěpje widźomnu sčinić. K tomu Benjamin Wirth z Přirady za serbske naležnosće rjekny, zo akcija pokazuje, zo so w měsće Budyšin woprawdźe něšto hiba a zo móže so serbskosć tež tam jewić, hdźež wona njeje oficialneho razu, ale woprawdźe něšto priwatneho abo w priwatnym hospodarstwje. Mjeztym ma nimale 20 předewzaćow w Budyšinje serbske popisy. Mjez nimi su wobchody, posłužbne zawody a turistiscy poskićerjo.

Krabatowy młyn w Čornym Chołmcu dyrbješe předpředań kartkow za Krabatowu sagu online kaž tež telefonisce nachwilnje přetorhnyć. Kaž jednaćel Tobias Čižik zdźěli, bě nawal na tikety porno lońšemu wo dźesać króć wjetši, tak zo je předawanski system na swoje hranicy storčił - a to, hačrunjež su techniske kapacity lětsa hižo zwyšili. Dźěłaja nětko z połnej paru na tym, z předanju tiketow pokročować móc. Dalše informacije k tomu namakaće na internetnej stronje a w socialnych medijach.

Pućowansku šćežku wokoło Bjerwałdskeho jězora chcedźa krok po kroku ponowić. K tomu wupraji so póndźelu Hamorska gmejnska rada. Lětsa ma so na wotrězku južnje Delnjeho Wujězda hač k přistawej w Klětnom dźěłać. Cyłkownje płaći projekt 286.000 eurow, kiž sej gmejna ze Sakskej dźěli. Cyłkowna kolesowarska šćežka je 21 kilometrow dołha. Z toho maja so někak štyri kilometry dospołnje wobnowić, dalše wotrězki so zwuporjedźeja.