Powěsće: póndźelu, 10.02.2025

Redaktorstwo časopisa ewangelskich Serbow "Pomhaj Bóh" přewozmje wot klětušeho januara Katja Meyerowa. To zdźěli městopředsyda Serbskeho wosadneho zwjazka, Mato Krygaŕ, po hłownej zhromadźiznje sobotu w Hodźiju. Meyerowa pochadźa ze Sćijec w Michałskej wosadźe. Studowana inženjerka bydli hižo wjele lět ze swójbu w Münsteru. Pisa dotal prawidłownje w Pomhaj Bóh za dźěći. Dotalna redaktorka časopisa Trudla Malinkowa zamołwitosć kónc lěta woteda. Wona je wot lěta 2000 redaktorka "Pomhaj Bóh".

W januarje je w Hornjej Łužicy 21 firmow za dohromady něhdźe 450 ludźi krótkodźěło přizjewiło. To běchu tři předewzaća wjace hač w decembrje. Kaž Budyska Agentura za dźěło na zakładźe nachwilnych prognozow zdźěli, stej tuchwilu wosebje mašinotwar a tekstilowa industrija wot wupada dźěła potrjechenej. Kelko firmow woprawdźe statne pjenjezy za krótkodźěło dóstanje, móže agentura jenož ze zapozdźenjom rjec. To bě w lońšim septembrje w Hornjej Łužicy 52 předewzaćow z něhdźe 1.900 ludźimi - tróšku wjace hač lěto do toho, ale tójšto mjenje hač na přikład za čas hospodarskeje krizy 2009.

Za lětuši štwórty Swjedźeń komorneje hudźby Hornja Łužica su organizatorojo tójšto znatych hudźbnikow a ansamblow zdobyli. Srjedź awgusta wotměje so dźewjeć koncertow na hrodach a w cyrkwjach regiona. Kaž zarjadowarjo zdźělichu, zahaja Drježdźanscy kapałni solisća rjad koncertow w cyrkwi w Barće. Nimo toho wustupja w programje swjedźenja mjez druhim bračist Nils Mönkemeyer a komorny ansambl Berlinskich filharmonikarjow. Swjedźeń komorneje hudźby budźe wot 15. do 22. awgusta mjez druhim w Barće, Hrodźišću, Mužakowje a Žitawje.

Poskitk dźělenja awtow, kotryž je před poł lětom w Budyšinje startował, so hižo prawidłownje wužiwa. Mjeztym je za to něhdźe 160 wužiwarjow přizjewjene, zdźěli poskićer teilAuto. Tuchwilu ma dwě awće za wupožčenje na Dwórnišćowej stejo. Podobnje wjele wužiwarjow ma teilAuto w Zhorjelcu. Tam poskitk hižo dlěje wobsteji a awta so wotpowědnje husćišo knihuja. Třeće stejišćo w Hornjej Łužicy je w Niskej, tam pak je wothłós wo tójšto snadniši. Za dalše města w regionje teilAuto dotal žane plany nima.

Na Wotrowskim dartowym turněrje je so po sydom hodźinach wubědźowanja Robert Lange wot dartoweho towarstwa z Łutow přećiwo Oliverej Schmidtej towarstwa Angry Birds z Małeho Wosyka přesadźił. Jako najlěpši Serb a najlěpši hrajer, kotryž njehraje w towarstwje, je sej 16-lětny Jan Šnabl z Róžanta 3. městno wubědźił. Na dartowym wubědźowanju sobotu we Wotrowje je so 48 hrajerjow wobdźěliło.